Hun rei tak hnua champions league khel phak ve leh nawlh tur Aston Villa chuan an squad thuamchak hna an thawk chho zel a, Everton atangin Belgium midfielder Amadou Onana an la lut.
Villa hian Onana manah £50m an seng a, hun rei tak daih contract an ziahpui. Euro 2024-ah Belgium tana langsar tak midfielder Onana hian kum 2022 khan Lille atangin Everton a zawm a, Toffees hian Onana manah £33m an seng. Everton tan hian inelna hrang hrangah vawi 72 a khel a, goal li a thun. Kum 2023 khan Arsenal chuan lak tumin an lo hel tawh a, Gunners hian an dawr hlawhtling ta lo thung.
Unai Emery enkawl Aston Villa hian an defensive midfielder Douglas Luiz chu Juventus hnenah £42.35m in an hralh. Luiz an hralh vang hian defensive midfielder thar lak luh ngei an mamawh a, Everton atangin Onana an lak ngei tumin an dawr a, inremna an nei fel thei ta a ni. Onana hian Belgium tana a khelhpui thin Youri Tielemans chu Goodison Park-ah a fin ve ta a ni.
Kum 1982-83 hnu lamah a vawi khat nana champions league khel tur Villa hian an squad thuamchak nan £140m zet an seng tawh. Chelsea atanga Ian Maatsen lak nan £35m an seng a, Juventus atanga player pahnih; Samuel Iling-Junior leh Enzo Barrenechea te lak nan £18.6m an sen a. Hull City atanga Jaden Philogene lak kir nan £18m an seng a, Luton Town atanga Ross Barkley lak nan £5m an sen bakah Everton atanga Lewis Dobbin lak nan £9m an lo seng tawh bawk.
Villa hian English Premier League season thara an inlan hmasak ber August 17-ah West Ham an hmachhawn ang.
Aston Villa in Onana an la lut
![](https://theaizawlpost.org/wp-content/uploads/Clipboard01-1933.jpg)