Astronaut Shukla hming chawiin kawngpui leh park

Astronaut Shukla hming chawiin kawngpui leh park
India zinga International Space Station (ISS)-a zin hmasa ber, Group Captain Shubhanshu Shukla chu a chenna, Uttar Pradesh-a Lucknow-ah ropui taka hmuah tum niin kawngpui leh park pawh a hminga dah tuma ruahmanna siam a ni.
City Mayor Sushma Kharakwal-a chuan tual chhung roreltuten an in panna kawng leh an khawpuia len khawthawnna hmun chu a hminga dah turin rawtna a awm tih a sawi.
“Shubhanshu Shukla hian kan khawpui leh ram hi ropui takin a lantir a. Khawvelin Lucknow mi a hria hi kan vannei hle a ni. An in panna kawngpui leh park chu a hming chawitir tuma rawtna a awm tawh a. Lucknow a lo thlen hunah councillor zawng zawngin tumhmunah kan lo dawngsawng ang a, kan nghakhlel hle tawh a ni,” tiin Kharakwal-a hian ANI hnenah a sawi.
Shukla hian a chenna, Lucknow hi National Space Day lawmna hmanpuiin Zirtawpni leh Inrinni hian a tlawh dawn nia sawi a ni.
Thawhtannia parliament-a Lok Sabha thutkhawmah pawh ‘Viksit Bharat By 2047’ tih programme huanga India mi ISS-a zin hmasa ber chungchang hi sawi a ni a. Speaker Om Birla chuan a hlawhtlinnaah Group Captain Shukla a lawmpui thu a sawi.
Congress MP Shashi Tharoor-a pawhin Group Captain Shukla-a’n tun hnaia hlawhtling taka ISS a tlawh thei chu lawmawm a tih thu leh India-in van thengrenga mihring tirh a tumnaa pawimawh tak a nih thu a sawi.
Shukla hian Thawhtanni khan Prime Minister Narendra Modi chu a chenna, Lok Kalyan Marg, Delhi-ah a hmu a. Modi-a hian ISRO astronaut jacket nena inthuam hi lawm taka lo dawngsawngin a kuah a, a dara kuahin kein a kalpui bawk.
Modi-a hnenah hian Shukla chuan Axiom-4 mission chungchang hrilhin ISS atanga khawvel thlalak a hmuh bawk.
Zirtawpnia Independence Day vawi 79-na lawmnaa thuchah a sawinaah prime minister hian Shukla hlawhtlinna hi a lo fak tawh nghe nghe.
Delhi Chief Minister Rekha Gupta, Union Science & Technology & Earth Sciences Minister Jitendra Singh leh ISRO Chairman Dr V Narayanan te pawhin lawmpuia chibai an buk bawk.
Shukla-a hi NASA-in Axiom-4 (AX-4) space mission a kalpuiah ISS-ah hian zin vein July 15 khan khawvelah an let a, Pathianni khan US atangin Delhi a thleng.
Axiom-4 Space Mission hi NASA hmunpui, Kennedy Space Centre, Florida, US atangin June 25-ah thlawh chhuahtir a ni a. California-ah tum lehin kum 41 hnua Indian zinga van thengrenga zin chhuak leh hmasa ber a ni.
Ni 18 chhung khawvel hela ISS-a hun an hman chhunga a kalpui astronaut dang – Peggy Whitson (US), Slawosz Uznanski-Wisniewski (Poland) leh Tibor Kapu (Hungary) te nen scientific experiment vawi 60 chuang leh outreach activity vawi 20 an ti a ni.