ATHEIST TANA THU HAR

By Rev Dr Ramengliana
New Atheists ho hlawhtlin riauna pakhat chu Atheism hi mi changkângte nih dan tur leh tunlai huna Pathian awm la rin tlut mai chu vengvat thlak lohah an chhuah thei titih hi a ni. Thil awmzia tak zawkah chuan Atheism hian mihring ngaihtuahna pangngai, chiang saa kan ngaih leh nunpui mai hi an kalh zar zar zawk a; Atheism humhim tum hian atheist-te an tang ngar ngar zawk a ni. Hei hi Theist (Pathian ring) nih nawmna leh Atheism harsatna a ni ve reng reng a. Atheism hi a dik a nih chuan, kan rilru ngaihtuahna hi engnge ni ta ang? Atheist chuan thlarau a hnawl avangin taksa chauh a awm tia ngaitu (physicalist/materialist) a ni lo thei dawn lo va. Rilru pawh kan taksa hnathawh dan pakhat ve mai a ni dawn a ni. Chuti a nih chuan engmah lo atanga lo awm, lungtum changkâng deuh a ni tihna a nih chu. Chutiang engmah lo thu sawi chu chaw tak khuka khukpui chi pawh va ni suh, a tih theih a ni. He ngaihdan hian mihring hlutna a tihniam hle tih a chiang.
Rilru an then hrang lo
Mihring rilru chungchângah hian inhnialna tawp hlei thei lo a awm a. Mihring ngaihtuahna pangngai chuan taksa leh rilru/thlarau chu a hrang a ni tih a pawm mai a. Chu chu Dualism an ti a ni. Dualism hi Atheism chuan a hnawl a ngai a, chuvangin mi tam takin rilru leh taksa a hrang tih hi an hnawl tawh a ni. Amaherawhchu, Physicalism (rilru a hranga awm lovin, taksa hnathawh chi khat mai a ni) hi a dik êm avanga Atheist ni ta an ni lem lo. Taksa (matter) piah lama ‘thlarau’ (rilru, mind nen sawikawp ta ila) a awm a nih ngat chuan an tanna chu a dik loh chhiava dawn mai vang a ni.
Sawi tak ang khan rilru thil hrang a nihzia hi sawibo an tum nasa hle a. Ngaihtuahna chu thluak hnathawh pangngai ni ve maiin an sawi a. An zawhna chu – rilru leh taksa chu a hrangin lo awm ta se, thawk dun turin khawi hmunah nge an insut ang le? Thil danglam tak ve ve, taksa nei leh nei lo, hi thawk dun thei niin a rinawm loh, tihte hi an hnawl chhan a ni a. Tin, dualism hi a dik a nih chuan midang rilru kan hre thei miah lo a ni, an ti bawk. Taksa leh rilru chu a kal kawp thin tih chu nunphung pangngaiah a chiang a. Ka taksa a pemin a na thin a, ka rilru a chauhvin ka taksa a zawi thin a ni tih kan hria. A inzawmna lai tak hriat a theih rih loh a nih pawhin a chu chuan a inzawmzia leh thil hrang an nihzia a hnawl lo. Tin, midangte rilru chu hre diak diak vek lo mah ila, khawvel thil dang hria kan intih dân ang thovin kan hre thei a ni.
Evolution pawm vang em ni?
Thenkhat chuan science thudik anga an ngaih evolution avang hian rilru hi a hranga awm thei lo turah an ngai a. Hei hi evolution-in a ken tel a ni reng a. Paul Churchland chuan, “…evolution zirtirna zinga pawimawh tak pakhat chu mihring piankena tel zawng zawng hi taksa thil vek a ni tih hi a ni a…hei hi a dik a nih chuan taksa piah lam mihringah hian a awm a tulna leh a theih dan kawng a awm hauh lo va, taksa nei lo thil reng reng mihringa bel theihna kua a kaw lo a ni. Taksa chauh kan ni a. Chu thu dik chu kan nunpui mai tur a ni,” (Matter and Consciousness) tiin thil awmzia a sawi a ni.
Paul Churchland-a thu sawi hi thu dik anga kan pawm dawn chuan naturalistic evolution hi a dik hmasak a ngai thung a. Chu chu thudik awm sa a nih lem si loh avangin sawi ngai lo tluk a ni. A lehlam zawnga chhûtin evolution hnialthlatu a ni thei hlauh thung a. Thluak leh rilru hi thil hrang a nihzia kan tihlan theih chuan naturalistic evolution chu a dik lo a ni mai dawn a. Hei hi evolution pawm ho tana thu hlauhawm tak a nih theih zawk dân a awm. Thil mai mai (matter) atangin hriatna (consciousness) a ‘evolve’ a lo ni ang a; taksa (matter)-a thil la awm miah lo rilru ngaihtuahna (conscious mind) kha hun emaw hnuah a rawn awm thar ta a ni dawn a. Chu chu awm lo (nothing) ata thil lo awm a ni dawn a, rin a harsa takzet a ni.
Neuroscience lamah tanpuitu an zawng
Tunlaia vengva deuha inngai chinin neuroscience lam atangin ‘mind/soul’ an sawi bo nasa hle. Thluak chungchâng an zirna lamah rilru kan tih hi he thluak hnathawh bak a nih lohzia science thudik, proof nei ang hiala sawi an awm thin. Thluak hlawm hrang hrang hian hnathawh bik an nei theuh tih an hmu chhuak tawh a ni awm e. Tin, pawn lam thil thleng ang zelin thluak a danglam dante pawh an chian(proved) tawh bawk, ti pawl an awm.
He thu hi dik pawh lo ni ta se, rilru/thlarau a awm lo tih chu a ‘prove’ zo chuang ngang lo a ni. Hemi chungchângah kum 2006 khan Scientist Joshua D. Green chuan a thlen chin a hre chiang hle: “Scientist-te chuan dualism hi a dik lo a ni tih ‘official’ takin kan hria a nih loh pawhin hria emaw kan inti a. Biology khawl changkang tak kan nih hi chu a hi chu a chiang. Mahse he thil hria kan intihna chhan hi chu pan tak a ni. Thlarau a awm lo tih hi chu kan la fiah thei ngai lo a ni.
Rilru hi a hrangin a awm tih a chiang
Dualist hi chi hnih an awm a. Property dualist -ho chuan rilru chu thluak nihphung pakhat (property) pakhat a ni an ti a, substance dualist -ho chuan rilru/thlarau chu thluak laka hrang hlak, amaha awm a ni an ti thung. Taksa nei lo rilru chu a awm hrang a ni tih a hriat theih dân chu:
1. Kan hriatna (consciousness) hi kan tawnhriat (experience) theuh a ni a, chutah chuan thil tam tak a awm thei tih kan hria (entirnan, nâ kan hriatna).
2. Kataksa bung hrang hrang ni lo, thildangin a pawlh miah loh, thil dang zawngz awng thlirtu ‘Kei’ ka awm tih ka hria. Hun kal zelah pawh hei hi a ngai reng a ni tih kan hre mai.
3. Pawna lungtum awm leh, chumi chu a awm a ni tih ka hriatna chu thil dang daih a ni. Engemaw ‘chungchâng’ kan hriatna hi taksa thil chauh chuan a nei ve lo.
4. Rilru chuan hmun (space) a luah ve lo va, khawiah nge a awm tih inkawhhmuh (location) theih a ni lo.
5. Kan gaihtuahnaah ka rilru leh taksa hi a hrangin a awm thei a ni tih ka hria a. Ka taksaa ka awm hi ‘loh theih loh’ a ni lem lo tih ka hre bawk. Ka taksa nen hian ‘thuhmun’ kan ni lo tih ka hre thei mai.
He kan rilru hi thilmak berte zinga mi a ni lo thei lo va. Tunlai science thiamna atang pawhin a nihna hi hriatchian a la har reng a ni. Atheistic worldview harsatna lian ber pakhat a ni thei hial awm e. Physicist leh Atheist Steven Weinberg meuh pawhin mihring ‘hriatna’ (consciousness) chungchâng hi a awl loh êm avangin kal kân deuh mai tul dawnin a hre hial niin an sawi.
Pathian atangin sawi fiah a awlsam
Theist-ho erawh chuan he kan hriatna (consciousness) famkim lo hi Pathian hriatna (consciousness) famkim atanga kan dawn a nih kan pawm mai a. A hahdamthlak a, lungtum atanga lo awm a nih rin ngawt ai chuan a awl zawk fê a ni. ‘Father of Modern Neurology’ an tih hial Wilder Penfield chuan thluak chungchâng zir chian a, thluak piah lamah rilru/thlarau a awm lohzia fiah a tum a. Phûngzawl natna vei mi 1000 chuang a zir chian hnuah thluak leh rilru chu a danglam a ni tih a hmuchhuak ta zawk a: “To expect the highest brain mechanism or any set of reflexes, however complicated, to carry out what the mind does, and thus perform all the functions of the mind, is quite absurd. What a thrill it is, then, to discover that the scientist, too, can legitimately believe in the existence of the spirit,” a ti chhuak hial tih Lee Strobel-an a lehkhabu chhiarhlawh takThe Case for a Creator tihah a ziak. Nobel Prize pawh lo dawng tawh thluak lam specialist John C. Eccles pawhin, “I am constrained to believe that there is what we might call a supernatural origin of my unique self-conscious mind or my unique selfhood or soul,” (Karl R. Popper and John C. Eccles, The Self and Its Brain) a ti a ni.
Tlangkawmna
Mihringa thlarau awm hnawltu Physicalism hi a dik a nih chuan mihring zalenna, duhthlanna sawi theih a ni dawn lo a ni. Kan thiltih zawng zawngah mawhphurhna kan nei lo tihna a niang a, mi sual hrem leh mi tha chawimawiin awmzia a nei dawn lo a ni. Kan ngaihtuahna takngial pawh hi rintlak a ni lo vang, a chhan chu ‘rem sa’(determined) a ni vek mai dawn a. Dualism emaw Physicalism emaw thlan pawh awmzia a awm dawn lo a ni! Chuvangin, rilru ngaithuahna fîm (consciousness) kan neih avang hian taksa laka hrang thlarau kan nei tih a chiang a; chu kan thlarau chu amaha nunna nei lo atanga lo piang chhuak anga ngaih ai chuan Pathian atanga kan dawn tih chu mi pangngai tan chuan pawm a awl zawk daih mai.