Kumina a hunlaia mipui ngaihven hlawh khawp chanchin nei ve ve, Republic Venga ATM bomb-tu leh Chhiahtlang daia mi pakhat thattu chu court–in an chungchang a ngaihtuah hnu ah thiam loh chantir an ni a, hremna pek an ni ve ve bawk.Kumin May 16 zing khan Serchhip Bukpui leh Chhiahtlang Chhimveng inkar kawngthlangah ruang chhar a ni a, a hnu ah amah hi Lalsangzuala (31), Mission Vengthlang a ni tih hriat a ni.
Police-ten an chhuizuinaah tualthattu nia rin an man a, thu an zawhfiahnaah a ni tih inpuangin, amah hi Laldinthara (42), Khawruhlian khawchhuak a ni. Police hmaa inpuan danin, Lalsangzuala nen hian inhre sa an ni loa, 2023 May 15 zanlai khan Bukpui atangin ke in Chhiahtlang a pan laiin, lirthei kal Lalsangzuala nen hian an intawng a, an titi dun reng hnu ah intibuaiin lungin a chhu ta mai niin a insawi. Hetianga a chet hnu hian Lalsangzuala lirtheia hian a tlanchhuak a, a chetsualpui hnu ah ke in a kal zui ta nia sawi a ni.
May 16 zingah Aizawla kal tur maxi cab service pharin a chuang a, TNT Muanna Vengah ruihtheih thila buai nia insawiin, a lut a, he hmun atang hian police-te hian an la ta a ni.
He thubuai hi Additional Sessions Judge Aizawl Judicial District Ngursangzuali Sailo chuan ngaihtuahin, thil thlen dan, finfiahna awm leh thuhretute zawhfiahna atangin Laldinthara hi thiam loh a chantir a, damchhung lung in tang tur leh sumfai Rs. 10000 chawi turin a hrem a ni. A sumfai chawi tur hi a pe lo a nih chuan lung inah ni 90 dang a tan belh ang.
Kumin February 18 zing dar 2.50 vel khan Republic Veng Kawipuia ATM booth chu bomb hmanga beih a ni a, pawisa dahna chu him mah se, ATM booth hi a tichhe nasa hle a ni.
He thil thleng hi police-in chhuizuiin pawikhawihtua puh Emmanuel Lalbiakzauva (24), Mamit district Bawngthah khua, hetih laia Aizawl Ramhlun Venga cheng chu man a ni.
Police-te chhuinaah Emmanuel Lalbiakzauva hian Bethlehem Venga ATM booth hi a lo khawih chhe tawh nia sawi a ni a, Saikhamakawna ATM booth pawh tihchhiat a tum niin a insawi bawk. Kumin January khan Kulikawn atangin mi bike a ru tih hriat a ni a, he bike hi amah an chhuichhuah theih chhan pakhat a ni. Man a nih lai hian a kut atangin gelatin tlawn 5 man tel a ni.
Addl Sessions Judge Aizawl Judicial District Court tho hian a chungthu hi ngaihtuahin, thiam loh chantir a ni a; kum khat lung in tang tur leh sumfai Rs. 280000 chawi tura hrem a ni.
ATM bomb-tu leh tualthatu hremna pe
