Kumin February 18 zana Aizawl Republic Venga ATM booth bomb chhetu Emmanuel Lalbialzauva (24), Bawngthah khua, Mamit district, tuna Aizawl Ramhlun North-a cheng mek chu police-ten an man.
Aizawl SP C Lalruaia sawi danin, Republic Venglai ATM, puakthei thil hmanga beih a nih thu an dawn chu case serious tak a nih avangin mi 11 awmna Special Investigation Team an din nghal a; case investigating officer atan Aizawl South SDPO Lalrinpuia Chenkual an ruat a ni.
SIT hian hnuchhui zuiin, February 18 tlai lamah Bethlehem Venga Apex Bank ATM-a CCTV chu spray-a kah dum a nih thu report an dawng a. He report bawhzui hian Republic Venga ATM khawih nen mi pakhat thiltih ngei a nih an ring a ni. February 20 zing dar 4.00 khan Saikhamakawna SBI ATM chu karchhiat a ni leh a. Heng ATM pathuma CCTV atang hian pawikhawihtu hi inthuamna inang, mipakhat thiltih a ni tih an finfiah tih SP hian a sawi.
Pawikhawihtu chetvelna hi CCTV hrang hrang atangin SIT hian chhuizui zelin, Ramhlun North Thlanmual mawnglamah an chhuilut a, chulai hmuna FZ bike ding, lo inkhuh chu pawikhawihtu bike hman nia ringhlelin an chang a, uluk taka an chan laiin ATM khawihtu nia an rin chu lokalin an man ta tih a sawi a. A bike hman hi kumin January thlaa Kulikawn atanga a ruk tih sawi a ni.
SP chuan zawhna chhangin, pawikhawihtu-in police hnena a sawi danin, college kal a chawlhsan hnuin an khaw lama kuthnathawh ai chuan, Aizawl lama awm a, eng eng emaw thawhkual a tum a. Nitin labour-a inhlawh ai chuan tiin State Bank of India-ah loan a dil a, SBI-a thawktuten an chhan danin a rilru a ti na a, ATM atanga pawisa ruk chhuah chu a tum ber a ni loa, SBI ATM te chu khawih chhiat a tum hrim hrim tiin a hrilh thu a sawi a ni.
ATM booth bomb-tu man
