Site icon The Aizawl Post

ATP Finals – Alcaraz a chak awlsam

Thawhtan zan khan ATP Finals group match khelh chhunzawm a ni a, Ivan Lendl group a inkhel hmasa berah Carlos Alcaraz an awlsam takin hnehna a chang. Inkhel dngah Daniil Medvedev-a’n tualchhung tlangval Flavio Cobolli a hneh a, Italy mipui ka a hup ve bawk.
Grand Slam-ah vawi sarih zet champion tawh chunga ATP Finals a la champion lo Carlos Alcaraz hian group match a khelh hmasak berah world number eight Frances Tiafoe a hmachhawn a, minute 69 chhung lekin hnehna a chang hman. Superman ang maiin a khel tha si a, a khingpui hian tih ngaihna hlawl a hre lo a ni ber mai. Inlehthalna lian thlentir beiseiin Court pan bawk mahse Tiafoe hian Alcaraz a ngam lohzia a lantir nawn leh ta tho a ni.
ATP Finals-ah a vawi khat nan champion tura tan khawh Alcaraz hian tha chungchuang takin bul a tan a, set khatna tir phatah a khingpui hi vawi hnih a break zawn nghal a, 4-0 ngawtin hma a hruai. Tiafoe hian game hnih la zawn bawk mahse Alcaraz hian game hnih chauh hloh chungin set a la zui ta tho.
Set hnihnaah Tiafoe-a’n bul tan tha hret mahse thil a danglam tam thei chuang lo. Alcaraz hian break vawi hnih a nei zui leh a, game hnih hloh chunga set la zui lehin American Frances Tiafoe hi 6-2 6-2 in a hneh a, minute 69 chhung lekin hnehna a chang hman.
Player thiam, huaisen leh tlo Carlos Alcaraz hi hliamin a tibuai a, beisei angin kum 2026-ah a che ropui thei lo. Grand Slam pahnih; French Open leh Wimbledon a hmachhawn thei lova, champion lai a nihna US Open ah Ben Shelton paltlang zo lovin quarter-final-ah a tla. Ban rek hliam vanga a chawlh leh hnuin a kir a, Vienna leh Paris-ah champion in a khel tha chho leh viau tawh a, vawi 10 a chak zawn leh ta hial a ni. A dam tha a nih chuan ATP Finals-ah pawh hian champion tura rinkai ber a ni.
Ivan Lendl group a inkhel dangah ATP Finals a lo champion tawh Daniil Medvedev chuan Italy tlangval Flavio Cobolli a hmachhawn a, inkhel hmuhnawm takah set hloh lovin hnehna a chang.
Medvedev leh Cobolli te hian inhnehtawk takin bul an tan a, set khatnaah tie-break khelh a ngai nghal. Tie-break-ah Russian a chungnung. Harsa taka set hma a lak hnuin Medvedev hi set hnihnaah tha zual zawkin a inlan a, game thum chauh hloh chungin set a la a. Italy mipui te tan rawn Cobolli lakah hian 7-6 (7-4) 6-3 in hnehna a chang zui ta a ni. Medvedev leh Cabolli te hian Alcaraz leh Tiafoe te an hmachhawn zui leh ang.

Exit mobile version