Sawrkar laipui ruahmannaa khawpuia cheng, chenna in neilo tana in sak tanpuina, PMAY- Housing for All (Urban) Mission hnuaiah Mizorama a dawng tur chhungkaw 37450 thlanchhuahte chu kumin August ralhmaa in 1st instalment pek hman vek tum a ni.
UD&PA department hotute sawi danin, Mizoram pumah PMAY- Housing for All (Urban) Mission hnuaiah hian in sakna dawng tur (beneficiaries) chhungkua 37450 an awm a, tanpuina hi cheng nuai 1.5 theuh instalment thuma pek tur a ni. Chhungkua 29997-in 1st instalment Rs. 60000 theuh an dawng tawh a, a la dawnglote hi kumin August ralhma in 1st instalment Rs. 60000 theuh dawn tir hman tumin theihtawp chhuah mek a ni. Kum 2024 ralhma ngeiin chhungkua zawng zawngte hi in sak tanpuina an dawn tur ang zawng zawng pekim vek hman tura hma lak mek a ni.
PMAY -Urban hnuaia in sak tanpuina dawng turte hi, in sak tanpuina pek an nih hma in, UD&PA department chuan inhrilfiahna hun (sensitisation programe) a nei thin a. Tunlai pawh hian Aizawlah chuan neih mek niin, District leh khawpui dangah pawh hetiang inhrilhfiahna hun hi sum pek chhuak hmaa neih zel a ni a. Tunlai hian khawpui hrang hrangah hman mek a ni. Inhrilhfiah zawh hian a dawngtu turte hian an sum dawnte in sakna’n ngei hmang tura intiamkamna an ziah hnuah fund hi an dawng chauh a ni.
PMAY-HFA (Urban) Mission hnuaiah hian Mizoram khawpui 23 (census town) ah in sak tanpuina hi pek mek a ni.
August ral hma in in sak puihna pek vek tum
