Kum kal mek, April atanga August inkarah Taxation department chuan chhiah chi hrang hrang cheng nuai 492.90 a hmu tawh.
Taxation department hian kum 2022-2023 chhunga sum an hmuh tur zat bituk chu cheng vaibelchhe 900 a ni a, an hmuh zawng zawng chu cheng vaibelchhe 1020.66 a ni. Hengte hi Ningania Deputy Commissioner of State Tax office Hnahthial hawnnaa sawi a ni.
Office hawngtu Taxation minister Lalchamliana chuan kum kaltaa Taxation department-in sawrkarin chhiah khawn tura a tuk zat a khum chu a lawmawm hle rualin, sawrkar budget nen khaikhin chuan a beitham hle tih a sawi a. Sawrkar sum hnar pahnih – tax revenue leh non tax revenue a awm thu sawiin, non tax revenue – tui bill, electric bill, stamp fee leh a dangte ah mipuiin tlawm zawka kan hman theih nan sawrkarin sum tamtak sengin subsidy-in min pe a, chu chu hriatpuiin mipui pawhin a pek lamah tan lak zual a tul tih a sawi
Sawrkar laipuiin chhiah a lakluh zawng zawng atanga zaa 0.50 chu Mizoramin a chang ve a. Chu chu Mizoram sum hnar lian ber a ni tih minister hian a sawi a. Mizoram chuan a mamawh zat zaa 10 chauh a lakluh thu sawiin, chhiah pek chu mipui mawhphurhna a ni hria a, a inhrilhhriat kawngah uar lehzuala inzirtir ngai a tih thu a sawi bawk.
“Mizote hi pipute hunlai atang tawha chhiah pe thin kan ni a. Thawkkhat lai atang khan engkima sawrkara innghah tumna rilru a piang ta mai hi a pawi. Chhungkua, khua leh ram zahawm ni tur chuan intodelh a, mahni kutkea din theih a pawimawh a, chumi tur chuan nasa lehzuala tan lak a ngai,” Lalchamliana hian a ti.
August thleng chhiah nuai 492.90 lut tawh
