Inrinni final match-ah 6-3, 6-2-a Chinese nula Qinwen Zheng hnehin Belarusian second seed Aryna Sabalenka chuan Australian Open hmeichhe singles title a kawl lai a humhim a, tournament chhung zawngin Melbourne Park-ah khan reigning champion niawm hliah hliahin a inlan tluanchhuak!
Ti hian, Sabalenka hi kum 2013 champion leh a chipui ni bawk Victoria Azarenka hnu lama hmeichhe zinga Melbourne Park title humhim leh thei hmasaber a ni nghal.
Tuntuma final a luhna kalkawng bakah chiang lehzuala kan hmelhriat theihna’n kan han bihchiang deuh dawn a ni.
Kum 25 mi Sabalenka hi Belarus khawpui ber leh an rama khawpui lian ber ni bawk Minsk-a piang niin, kum ruk mi lek a nih lai atangin tennis a khel tan a; kum 2012 khan ITF Circuit-ah a a professional career tanin, tunah hian hmeichhe singles ranking lamah number two a ni mek a; a career-a grand slam title pahnih a lak tawhte hi Australian Open title (2023, 2024) ve ve a ni.
Kumin Melbourne Park-a hmeichhe singles final a luhna kawngah Belarusian hian frst round-ah Ella Seidel (Germany) chu 6-0 6-1-a hnehin, second round-ah Brenda Fruhvirtova (Czech Republic: 6-3 6-2), third round-ah Lesia Tsurenko (Ukraine: 6-0 6-0), (fourth round-ah Amanda Anisimova (U.S: 6-3 6-2), quarter-final lamah Barbora Krejcikova (Czech Republic: 6-2 6-3), semi-final stage-ah Coco Gauff (U.S: 7-6(2) 6-4) hnehin, final-ah Chinese Zheng a paltlang zui leh ta a ni.
Kum 2012-ah professional a luhchilh tan a, kum 2015-ah chuan singles title pathum leh doubles title pakhat a la hman tawh.
Kum 2016 khan Rabat khawpuiah a vawikhatna atan WTA qualifying event a khel a, a kumlehah chuan Dubai lamah a vawikhatna atan bawk WTA main draw a chuangkai a; kum 2017-ah chuan a tumkhatna atan WTA ranking-ah top 100 a hawlh a, world number 78-na ni chungin kum a khar thei tawh.
Kum 2018 a herchhuak a, New Haven leh Wuhan lamah WTA title hlawhchhuakin, world number 11-na nen a career-a a hmasaber ni turin top-20 huangah season a khar thei tawh.
Kum 2019-ah chuan WTA singles title pathum leh doubles title pathum bawk la chungin season a hmangliam a; chu’ng zingah chuan a Belgian partner Elise Mertens nen U.S. Open-a a Grand Slam doubles title hmasaber a tel nghe nghe.
Kum 2020 a herchhuak a, Doha, Ostrava leh Linz khawpuiah title lain, ranking-ah a san belh hret a, a top-10 season hmasaber a nghakchhuak.
Kum 2021-ah pawh Abu Dhabi leh Madrid-ah champion lehin, Wimbledon leh U.S. Open-ah phei chuan semi-final a thleng hial.
Kum 2022 U.S. Open semi-final lut zui lehin, a zawna a tumhnihna atan WTA Finals khel turin a tling a, tah chuan top 3 player pathum Jessica Pegula, Ons Jabeur leh Iga Swiatek a hneh hnuah Caroline Garcia ngam loin runner-up a ni.
Nium khan Elena Rybakina (Ka-zakhstan) hnehin Australian Open a hlawhchhuak a; Wimbledon leh French Open lamah semi-final thleng bawkin, US Open-ah runner-up a ni tel.
Nikm September thla khan a career-a ranking atawnsan ber hun thlengin number one a luah a; kuminah kum bul tan fuh leh nghal chatin, Australian Open title a kawl lai a humhim.
Aus Open champ Sabalenka i han bihchiang deuh teh ang
