Season thara Formula One intlansiak hmasa pahnihah Red Bull driver Max Verstappen ve ve chakin, pahnihnaah a team-mate Sergio Perez a thleng ve ve bawk a, nimin Australian Grand Prix-ah erawh Ferrari an chungnung ta thung a, Carlos Sainz Jr. thleng hmasaberin, a hnung chiahah a team-mate Charles Leclerc hmuh tur a awm a; pathumna chu Lando Norris of McLaren niin, lawmman semna dawhsanah Red Bull driver pahnih hmuh tur an awm ve ta lo!
Bahrain leh Saudi Arabia ang bawkin world champion Verstappen chuan Melbourne Grand Prix Circuit-ah pawh pole position luah leh mah se lap lina lekah a car hma ke dinglam break a chiang lo a, chu lai bawr atang chuan meialh a lo chhuak a, tlan chhunzawm thei loin a tawpsan a, Carlos Sainz a dingchan phah ta a ni.
Arab rama intlansiak hmasa pahniha podium sang ber dawttu luah ve ve Sergio Perez pawh Melbourne-ah hian lawmman semna dawhsan chuangkai pha lo zawngin panganaah a thleng daih a, Australia leilungah Red Bull one-two hmuh tur a awm ta lo.
Ferrari driver Carlos Sainz hi season-opening Bahrain GP-ah khan pathumna niin, a hnu lawkah a rilphir an zai a, Saudi Arabian GP-ah khan a inlan thei lo a, a aiah Briton rawlthar kum 18 mi Oliver Bearman inlanin pasarihna a luah a; tlankawnga Sainz a kir leh tak avangin Bearman chu Formula 2 lamah a kirleh ta rih a ni.
Spaniard Sainz hi season liamta khan Red Bull driver ni lo zinga race hnehna chang thei awmchhun niin, kuminah pawh non-Red Bull driver zinga pakhatna ni hmasaber leh awmchhun a ni leh ta phawt a, a vawihnih thum zo dawn em kan thlir ang.
Ti hian, kum 2022 round hnuhnung ber atanga chhiarletin race hnuhnung vawi 26-ah tum hnih Red Bull-in pakhatna an luah zo lo ve ta a, Ferrari nihna dik tak kan hmu chho leh tan dawn a ni thei mai ang em?!
Australia leilungah Ferrari 1-2 kan hmu nawlh!
