Kum khat dawn lai hliam avanga chawl tawh Rafael Nadal chuan season khat chhunga grand slam tournament hmasaber Australian Open khel turin thutlukna a siam a, Brisbane khawpuia warm-up tournament lamah pawh a inlan zak zak a, mahse, a khel bawr a tihnat leh tak avangin Melbourne khaw grand slam-ah a inlan thei dawn lo tih a nemnghet.
Kum 37 mi hian Brisbane International-a a match hmasa pahnihah straight sets hnehna chang ve vein, karliamta Zirtawpni khan quarter-final match-ah Jordan Thompson a hneh lo a; he match-ah hian khelmualah a hliam enkawl a ngai hial a; a chak loh hnuah a khel bawr hliam chu endik niin, scan atanga a lan danin a tihrawl a thler hlek tih hmuhchhuah a ni a, tunhma lama a intihnat thinna lai bawr kha ni lo mah se inenkawl turin Spain ram lamah a thlawkhaw leh ta nge nge a ni.
Spaniard hian kum 2009 leh 2022 khan Australian Open title hi hlawhchhuak ve tawhin, mipate zinga grand slam singles title la hnem ber Novak Djokovic um tura khelmual a kir leh hnuah hliam bawkin a tibuai leh a; a natna endik a nih hnuah tunhma lama a lo bawksawppui tawhna lai bawr a tina lo tih a hmuhin result tha a nih thu a sawi a, mahse, level sang bera inelna hmachhawn tur em chuan a intiam lo tih a sawi.
Brisbane International-a a bultanna inkhelah khan Dominic Thiem hnehin, kha kha ni 349 chhunga singles match a khelh leh vawikhatna a ni a, Melbourne Park lama major tournament a khelh ngei beiseina a len chhoh hle laiin a panna lai hliam bawkin a tlakbuak zui leh ta a ni!
Nikum khan Nadal hian kum 19 chhunga a vawikhatna atan a rorelna kumhlun ni thin French Open a khel thei lo a, Roland Garros-a a tel theih loh hnu May thlaah a hma hun chungchang a sawichhuak a, kum 2024 hi a career-a a kum hnuhnungber a nih theih tawh thu a sawi a, chuti a nih chuan vawihnih a champion ve tawhna Australian Open chu a khelh tawpna a nih tawh hmel laiin Melbourne Park-a major tournament khel nawn leh tawh lo chungin a chawl ve dawn ta nia ngaihna a lian chho ta a ni.
Chutih laiin Nadal hian a eng lam a la thlir fan a, Melbourne mipui hmaa inkhelh theih loh tur thu chu news lungchhiatthlak ni bawk mah se season kal mekah comeback leh tura beiseina eng a neih thu a sawi.
22-time Grand Slam champion Nadal hian social media kaltlangin Australia rama khelmual lut leh tura a thawhrim thu a sawi a, Australia leilunga inkhelh leh chu a duh takzet thu leh a duh ang ngeia match hnih a khel hman ringawt pawh a hlimpui thu leh beiseina siamsaktu a nih thu a sawi.
January ni 14 atanga khelh tan tur Australian Open a hawisan a ngaih tak hnuah Nadal hian May ni 20 atanga Paris khuaa khelh tan tur French Open lam a tinzawn leh phawt dawn tih a tarlang tel a; a hun taka fit hman turin record siama Roland Garros hmuna tum 14 champion tling thei awmchhun hian theihtawp a chhuah dawn tih a sawichhuak.
Grand Slam-a Spaniard Nadal inlan hnuhnunber tum chu 2023 Australian Open kha niin, tah pawh khan second round match pakhata Mackenzie McDonald a hneh loh tumin hliamin a tibuai leh bawk a ni.
June thlaa a khel veilam an zai thlengin khelmual a lut leh ta lo a, a chawlh rei avangin world number one hlui hi ATP ranking lamah pawh a tlahniam tawh hle a, tunah nian world number 672-na daih a ni tawh!
Nadal a inhnuhdawh leh tak avangin tuntum hi kum 1999 hnu lama Nadal emaw kum 2022-a tennis inelna chawlhsan Roger Federer emaw tel lo Australian Open men’s singles main draw kan hmuh vawikhatna tur a ni.
Australian Open-ah Nadal kan hmu leh dawn si lo!
