Aijal Club Park-a Horticulture Fair-ah kal la, thei hming i hriat ngai loh i hre thar teuh ang a, pangpar hming pawh i hre thar teuh ang. A tiak an lo hung tlar dul ang a, Mizoramah a nung thei tihna a ni ang.
Mizo thei neih sa leh pangpar neih sa bakah a chi thar, chi hrang hrang a awm a, tun hnai kum 10 chhungin chutiang chu Mizoramah a tam. Europe atanga an hawn a nung thei a, khawchhak lam atanga an hawn a nung thei, vai ram atanga an hawn a nung thei. A lo nung thei zel a, saron phei chu Mizoramah chi hrang hrang a tam tawh.
“Vaiho pawhin min awt alawm. Thei leh pangpar chi hrang hrang hi kan ramah a lo nung thei zel a, a lo tha duh zel a, mak an ti thei lutuk,” tiin thei leh pangpar tiak hmanga sumdawng thin, hnam dang dawr thin nu pakhat chuan a sawi a, tih chhin mek pawh a awm deuh reng thu a sawi.
Bible ram vela awm thin olive a lo tha duh a, theibuhfai (pomegranade) te, apple te pawh a lo tha thei. Theihai chi hrang hrang a awm nual tawh a, lamkhuang pawh a chi dang a awm nawk tawh.
Thei tiak buaipuitute sawi danin, tun hnaiah cashew nut a rah thei tih a chiang tawh a, rose water apple te, sophie, bawrai rah lian chi, pomegranade, black guava, custard apple, theihai chi hrang hrang, chung vel chu Mizoramah a tha thei tih an hre thar a, cocoa rah pawh a awm tan an ti.
Nghah mek, en chhin mek an sawi nual; macadomia tirah an la awm lo tih an sawi a, persimom pawh Mizorama an lakluhna a la rei lo a, an la chiang lo. Pangkai chi khat mango steen a nung thei a, a rah eng nge a an a la hriat loh an ti a, black stone mango, red ivory leh almond te a la rah lo an ti. Almond te hi chu a rah har chi a nih avangin nghah deuh a ngai dawn tih an sawi. Thailand lamkhuang leh duran lamkhuang te pawh nghah deuh a ngai ang an ti a, tengterechhungsen a la rah lo an ti bawk. Grape, a rah ei chi hi Mizoramah a tih tlak tak tak lo an ti bawk.
Pangparah green rose a par thei lo a, a par hi hnah awmkhawm angin a awm zel an ti. Camelia pawh a par tha thei lo an ti. A bak chu a tha thei zel nia an hriat thu an sawi.
Zinna atanga an hawn a awm a, hmun dang atanga tih tak taka chawlut an awm bawk. Hmun hrang hranga mi hi Mizoramah a lo tha duh zel an ti a, Mizoram lei leh sik leh sa hi a tha a ni an ti.
Aw Mizoram, ram vannei mi
