By Rev Dr Ramengliana
Miin hringnun atanga Pathian a han vawrh chhuak chu amah leh amah a inhnawl a lo ni daih mai a. A dam chhan, a hlutna leh a nih tur zawng zawng a chan ta daih a. Hringnun chu awmze awm lo a lo ni ta reng a ni. Hei hian Pathian awm ngeizia finfiah thei lo mah se mihring hi Pathian tel lova kan hlut lohzia leh beidawnthlakzia a tichiang em em thung a ni. Eng emaw zawng chuan Pathian awm ngei a tulzia a lantir kan ti thei ang. Heti zawnga chhut a, mihring tana a beidawnthlakzia sawi a, Kristian zirtirnaa mi hneh hi an chinna a la rei lutuk lo va. Amaherawhchu, tih dan tha tak leh finthlak tak a ni awm e.
Hringnun awmzia petu Pathian
Pathian a awm chuan hringfate tan thiltum (purpose) leh awmzia (meaning) chiang tak a nei tih a hriat nghal a. Chu chuan mihring hlutna a keng nghal bawk. Atheism chuan hei hi a pe thei lova, pe theia inngai an awm a nih pawhin an hre sual a ni ngei ang. Pathian tel lo sawifiahna (naturalism) chuan khawvel chu ‘hun, thil leh tih palh thil thu’ (time+matter+chance) -in engtin tin emaw a vawrh chhuah mai a nih avangin awmzia a nei lo va, eng thil pawh lo thleng se, ‘a dik emaw, a dik lo emaw, a hlu emaw, hlu lo emaw, a tha emaw, tha lo emaw,’ a sawi theih loh a ni. Mihring tana tha ber pawh hriat a har tawh a, “Hlim leh lawm, nat leh nawm piah lama boral vek mai hi a tha ber zawk dawn lawm ni?” a tih theih a ni. Engvangin nge thih aia dam a that zawk? Heti a nih avang hian Existentialist Philosopher Albert Camus chuan, “Chhanna kan mamawh ber chu thil dang ril tak tak a ni lo – ‘Engvangin nge mahni kan intihhlum loh vang?’ tih hi a ni,” (The Myth of Sisyphus, 1955) a ti mauh mai.
Atheism a beidawnthlak
Pathian awm ring loten khawvel an thlirna dinhmun, ‘naturalistic worldview’ (thlarau khawvel awm lo) atang chuan a chunga zawhnate hi chhân a har em em mai a ni. Chhanna ki tur a awm meuh loh avangin phuah chawp ti tih a ngai hial thin. Kristian scholar leh evangelist Ravi Zacharias chuan, “Mahnia lo awm mai anga ngaihna atang hi chuan tha leh tha lo tehfung leh hringnun awmzia tehfung hi a awm thei lo hrim hrim a ni,” (“Why I Believe Jesus Christ is the Ultimate Source of Meaning,” 2001) tiin helai buaina hi a lo sawi a . A tawpah chuan ‘ngawngna’ leh ‘beidawnna’ a ni ringawt. Atheist Philosopher Quentin Smith pawhin, “the most reasonable belief is that we come from nothing, by nothing and for nothing,” (“engmah lo atangin, engmah lo atan, engmah lovin a duan kan ni tih rinna hi thil pawm nahawm ber a ni zawk,” (Theism, Atheism and Big Bang Cosmology, 1993) a ti hial a ni awm e. Atheism hi a nihna tak takah chuan beidawnthlak tak a ni. Pathian atang leh chatuana awm tur kan nihna atang lo hi chuan hringnun awmzia, hlutna, leh thiltum a awm thei lo a ni. A chhan pawh a tawpah engmah lo a ni tho tho dawn si.
Nihilism kalkawng thim
Tunlai New Atheists te hi chuan heti êm êma beidawnthlak hian an sawi duh lem lo va. An hmakhalhtu Existentialists te leh Atheist ‘tak tak’ ho chuan hei hi an pawm tel ngam khawp mai a, an ngaihdan pawh nihilism an ti nghe nghe a ni. Friedrich Nietzsch leh Albert Camus te sawi thin a ni a. Nihilism chu hringnun hi awmze awm miah lo leh awmze pêk theih loh, engmahin hlutna tak tak a neih loh thu sawina a ni. John Blanchard-an a sawi fiah thiam khawp mai: “…hringnun hian awmzia a nei lo va. Van leh khawvel hian awm chhan, thlen tumna hmun a nei lo va, mihringte hian pan lam kawng kan nei miah lo. Mihring chu hmangaihtu Pathian siam a ni lo va, zawng nena inang tak ran nung kan ni satliah ve mai a ni. Eng emaw avanga lo awm ve ngawt, khuarelin a vawrh chhuah mai mai a ni. Thih hnu khawvel a awm lo va. Dam duhna rilru pangngai chauh lo chu mahni kan intihhlum mai lohna chhan tur a awm miah lo,” (Does God Believe in Atheists, 2000). Hetianga an tih theih chhan pawh Pathian awm an pawm loh vâng a ni ber a. Pathian ber a awm tawh loh chuan hei hi an dinhmun a ni dawn reng a ni. Hei hi Atheist zawng zawng ngaihdan a ni bîk vek chuang lo va. Existentialist thenkhat chuan hringnun awmzia pawh mi tinin kan pek chawp mai turah an ngai. Mahse, ‘pek chawp’ mai mai chu eng thleng tangkai ang maw? Atheism zirtirnain a thlenpui (logical conclusion) chu nihilism hi a ni tho tho tih a lang reng mai. Chuti a nih laiin, Pathian awm ring (theist) tan chuan hei hi a ni thei miah lo thung.
Minung Pathian awm lovin a chiang thei lo
Atheist nêm deuh ho chuan mihring pawn lama nun dan dik hriltu, mihringte hriatthiamna leh ngaihdanin a khawih buai loh ‘objective values’ chu a awm a. Chu chu hre tur leh nei turin Pathian a ngai chuang lo va, hringnun chhûngah hian chu chu kan hmuin kan hre thei mai a ni, an ti. He ngaihdan hi duhawm angreng tak, mahse bih chiana awmze awm vak lo a ni thung. A kengkawhtu tur Pathian ber a awm loh chuan chutiang ‘objective moral values’ chu awm tehrêng pawh ni se, eng vangin nge kan zawm kher ang? Eng vangin nge zawm lo palha inthiam lohna a awm theih ang? Hetah hian minung Pathian (personal God) a awm a tulzia a lang a. Tin, mihring leh leilung pawn lama thatna dân (objective moral values) a awm pawm thei si a, Pathian awm pawm theih loh chu thil mak tak a ni awm e.
Kristian zirtirnain rem fuh vek
Kristianna chuan hringnun awmzia, awm chhan leh thiltum a pe kim vek a, a pe mai ni lovin Atheism hlawhchhamna ruamah a hlawhtling zawk zel a ni, kan ti thei a ni. Pathian tel lova mihring buaina kan sawi khi a duhawm lo hle mai a. Atheism chuan nun hlim leh lungawi a thlen tam lo hle tih a lang reng. A nun awmzia, hlutna leh thiltum a hriat loh chuan mihring chu a hlim tak tak thei ngai dawn si lo va. Phuah chawp thilah chuan eng emaw chen a hlim thei a ni mahna, mahse phuahchawp mai mai chuan a daih reng dawn lo tih hriat sa a ni. Kristian zirtirna erawh chuan kan khawvel hmuh theih mai piah lamah khawvel Siamtu Pathian a awm avangin a thil siamte hian hlutna (tum neia siam), awmzia (tangkaina nei) leh thiltum (awmchhan tha tak ) an nei tlat a. Chungte chu mihring hlimna hnar an ni.
AWMZE AWM LO
![](https://theaizawlpost.org/wp-content/uploads/tap_logo-min-large.jpg)