Dr. C. Lalrampana
Tuna MNF party mi leh sa ni ta R. Lalzirliana hi Mizoram Home Minister ni tura ruat a nih tan chu Dec. 11, 2008 kha a ni, Lal Thanhawla Ministry-ah Home Minister Dec 11, 2013, leh term thar-ah 12 Dec 12, 2013-14 October 2018 thleng khan a chelh a. Home Minister a nih tirh phat khan LPS-a a sawi ka la hriat reng chu: 1. Zirlai pawisa khawn thin hi tihtawp a ni ang; 2. Burma mi a ruka Mizorama awmte man chhuah apiang tiauvah Burma sipai kutah hlan nghal zel an ni ang” a ti.
Mahse, term 2 kum 10 Home Minister a nih chhung khan pawisa khawn a titawp lova dan lova burma mi mizorama awm pawh pakhat mah burma sipai kutah a hlan kan hre ta lem lo.
Khatih hun laia R. Lalzirliana ngaimawh point 2-te kha a pawimawh hle. Tunlaiin kan Zoramah awmze nei lova pawsa khawn a hluar hle. MZP leh AMPEDA (All Mizoram Petroleum Dealers Association) inkarah pawh inhnialna a awm mek. Sept. 7, 2026 khan MZP chuan petrol pump manager thenkhatte sum an pek tir niin AMPEDA chuan a puh. Pump thenkhat chu Rs 2 lakh, thenkhat chu Rs 1.20 lakh pek turin tih an ni niin an sawi tih India Today NE chuan a tarlang.
AMPEDA chuan “Hetianga sum lak hi tihluihna/coercion a ni” tiin a puh a, sum pek tawh zawng zawng Sept. 16 hmaa an pek kir loh chuan Sept. 17, 2026 atangin petrol pump zawng zawng tiamchin awm lova kharah an vau tih PTI News chuan a sawi.
MZP erawh chuan “Tihluihna leh kut inthlakna a awm lo” a ti. Keifang-a LT Brothers Filling Station-a sum pek chu MZP Assembly tur Darlawn, Sept. 23–25 atan voluntary contribution a ni” tih an sawi niin India Today NE chuan a tarlang.
Hetiang thubuai MZP leh AMPEDA Pawl inkara thleng mek hi an sawi dan a inang lo hle. MZP-in “voluntary contribution” a ti a, AMPEDA-in “forced collection” a ti. Hetih lai hian allegations-te chu independent-a verify a la ni lo.
AMPEDA chuan September 7, 2026 khan petrol pump manager thenkhatte chu MZP office-ah an kawl/detain a ni a, chuta tang chuan: pump pakhat atangin Rs 2,00,000 MZP account-ah transfer tir a ni; pump dang thenkhat chu Rs 1,20,000 theuh transfer turin tih an ni; he pawisa lak hi tihluihna (coercion/extortion) hmanga lak niin an puh niin Northeast Now chuan a tarlang.
AMPEDA chuan Sept. 16 hmain pawisa pek let leh pawisa pe tura an tihte sut vek turin MZP an phut. A nih loh chuan September 17, 2026 atangin petrol pump zawng zawng kharah an vau.
MZP erawh chuan “Tihluihna emaw, kut inthlakna emaw a awm lo” an ti. An sawi ber chu LT Brothers Filling Station, Keifang chuan MZP Assembly, Darlawn, September 23–25 tur atan voluntary contribution a pe niin an sawi.
MZP sawi danin pump hi a hmain Lalthanzauva ta a ni a, chutah Sandeep, Haryana mi hnenah hralh a ni tawh a; tunah Nitesh chu manager a ni. MZP-in phut dang an nei. Mizoramah petrol pump thenkhat Mizo hming leh licence hmanga register ni mah se, hnam dangte”n an enkawl emaw an neih emaw a awm niin an sawi. Chuvangin sorkar chuan hetiang proxy ownership/operation hi enchiang se, dan kalh a nih chuan licence pawh tihtawpsak an ngen.
“MZP-in petrol pump-ho hnenah tihluihnain Rs 2 lakh an la” tih hi proven fact anga sawi tur a la ni lo; AMPEDA allegation a ni. MZP-in pawisa pek an ni tih erawh chu MZP ngei pawhin a pawm, mahse, voluntary contribution a ni an ti. “MZP-in dan an kalh em? Extortion/illegal collection a nih theih dan leh police case-ah a kal thei em?
BNS (Bharatiya Nyay Sanhita)-ah hian “awmze nei lova pawisa khawn” hi Engvanga khawn nge, Engtin nge khawn a nih? tih azirin section hrang hrang a kalh thei: Pawisa pe turin vau emaw, tih thaih a nih chuan BNS 308-Extortion a ni.
Mi vau emaw, an sumdawnna tihchhiat emaw, an chanchin tha tih bawrhban emawa vau a, pawisa dil a nih chuan kum 7 thleng jail tan theih a ni.
Dawt sawi a, buma pawisa khawn a nih chuan BNS 318 – Cheating a ni. Entirnan – damlo tan tia pawisa khawn a, damlo awm si lo, NGO lem siama pawisa khawn, thilpek dawng tur awm ang a insawi a, khawn hi cheating/Bumna a ni.
Sorkar hming emaw, pawl hming emaw hmanga pawisa an khawn chuan: Sorkar department emaw, YMA, Kohhran emaw hming hawh a, phalna la si lova khawn chuan BNS 319 (Cheating by impersonation)-ah a luh belh thei. Miin “min vau a pawisa min dil lui” a tih chuan police ah BNS 308 hmangin FIR thehluh theih a ni.
MZP hian patrol dealer-te hi mizo an ni emaw Non-Mizo an ni emaw pawh ni se, eng dan tan chhanin nge pawisa a dil? Dan lova sumdawng lo ni pawh ni se, dan ang taka pawisa chawitir theitu leh chawitirtu tur chu Sorkar a ni. Thirchhe kudam, lirthei 2nd hand part dawr, non-Mizo Drivers, tourist hotel hrang hranga mite leh vai dawrkai tinah awmze nei lova pawisa khawn an tam thin hle niin kudam pakhat ka zawh chuan a sawi.
Chuvangin, Sorkar hian hetiang thil tha lo tak hi a bo theih nan theihtawp chhuahin hma la se, a tih tur dik tak ti se, a hman hmanin pawisa an khawn thin hi a tawp theih nan awmze nei lova thawhlawm khawn thintute hi man chhuah tumin zawng chhuak se, dan lova titute man chhuah an nih chuan an phu tawk hremna pe hmiah hmiah tawh thin se hetiang buaina hi kan pumpelh thei ngei ang.