‘Bad Guys’ leh ‘Naked Gun’ nawr tawlh zawh loh ‘Fantastic Four’
Marvel superhero ‘The Fantastic Four: First Steps’ chuan an tlangzarh atanga weekend vawi hnihnaah USA-ah cinema hall ticket hralhna 66%-in tlahniamin, film ngaihven hlawh pahnih ‘Bad Guys 2’ leh ‘Naked Gun’ te tlangzarh thar mah se box office No.1 a la ni tho e.
Box office ranking hi US-a weekend (Zirtawpni – Pathianni) a cinema hall ticket hralhna sum chevel atanga siam thin a ni a, ‘Fantastic Four’ hian a weekend vawi hnihna, tun weekend kalta khan US-ah dollar maktaduai 40 la lut lehin, a kar hnih nan box office-ah a No.1 ta a ni. He film hian kar hnih chhungin US-ah dollar maktaduai 198.4 a la lut tling ta a, US pawnah dollar maktaduai 170.3 la lut tawh bawkin, a vaiin dollar maktaduai 368.7 a la lut tling ta a ni.
Film tlangzarh thar ‘Bad Guys 2’-in dollar maktaduai 22.2 la lutin, No.2-ah a debut a, he film-ah hian Sam Rockwell, Marc Maron, Craig Robinson, Antony Ramos leh Awkwafina ten an aw an thawh leh a, a thawhthu hi Aaron Blabey lehkhabu ziah animal outlaw rual te chanchin behchhana chan a ni. A film chhunzawmnaah hian heng ranrual te hian that ve tawh an tum viau a, mahse, ‘The Bad Girls’ an tawng tlat mai a, an chet a ngai leh ta tlat a ni.
Liam Neeson leh Pamela Anderson te channa ‘The Naked Gun’-in opening weekend-ah dollar maktaduai 17 la lutin, US pawna a lak luh nen chuan dollar maktaduai 28.5 a tling. ‘The Naked Gun’ hi comedy lama a changtupa bera Liam Neeson chan vawi khatna a ni.
‘Superman’-in weekend vawi linaah dollar maktaduai 14 la lut lehin No.4 a la ni a, he DC superero film hian US-ah dollar maktaduai 300 chuang la lut tawhin, US pawn nen chuan maktaduai 551.2 a tlin ta.
‘Jurassic World Rebirth’ pawhin dollar maktaduai 8.7 la lut lehin top 5 khartu a ni a, he film hian US-ah dollar maktaduai 448.4 la lut tawhin, US pawna a lak luh nen chuan dollar maktaduai 766 a la lut tling ta.
Box office top 10:
- The Fantastic Four: First Steps : $40M
- The Bad Guys 2 : $22.2M
- The Naked Gun : $17M
- Superman : $14M
- Jurassic World : $8.7M
- Together : $6.8M
- F1: The Movie : $4.1M
- I Know What You Did Last Summer : $2.7M
- Smurfs : $1.8M
- How to Train Your Dragon : $1.4M