Bagnaia chak mah se Martin dang zo ta chuang lo…

Bagnaia chak mah se Martin dang zo ta chuang lo…
Pathianni khan Barcelona khaw tlankawngah MotoGP season hmawr an bawk a, title race-a in um fal pahnih zingah two-time defending champion Francesco Bagnaia chuan hnehna chang mah se rider standing-a hmahruaitu Spanish rider Jorge Martin chuan lawmman semna dawhsan hniam ber luaha pathumna a hauh ve phak avangin Italian rider kuta title awm chhuhsakin a vawikhatna atan MotoGP world champion nihna a chang zui ve ta nge nge a ni.
MotoGP champion thar Martin hian season tharah chuan Pramac chhuahsanin Aprilia a zawm tawh dawn a, a team thar pawhin world champion lawmluh chu an phur phah lehzual ngei ang le!
Circuit de Barcelona-Catalunya intlansiak an tan thleng khan standing-a hmahruaitu Pramac Racing rider Martin leh amah hnaihbertu Ducati rider Bagnaia-te kha point 19 lekin an inthlau a; champion lai Italian Bagnaia tan a title humhim turin Barcelona tlankawnga pakhatna nih ringawt a tawk zo lo a, a elpui lian ber Spaniard Martin khan point a hmuh chhiat a ngai a, mahse, pathumna a rawn nih ve phak avangin defending champion tan a title kawl lai hum zui ngaihna a awm ta ngang lo a ni.
Point 10-a inthlau chunga world champion thar ni thei hram Martin chuan a hun tawnin a thawn thu intlansiak zawhah sawiin, “He title hi ka chhungte bakah min thlawptu zawng zawngte tan ka hlan e.
“Intlansiak kan zawh rual khan ka tan tan a ni nghal mai a, ka tan chuan hnuk hno kaichhuaktu race niin, tlankawnga chetsualna hraw tak tak hmachhawn chungin zinkawng thui tak a ni.
“Hma ka sawn zel ka beisei a, tunah chuan ka hun tawn hi ka han enjoy ve rih phawt ang e,” a ti.
Kha race-ah khan pole position atanga bul tan Ducati rider Bagnaia chak se kum 26-a upa Martin tan champion turin pakuana aia hniam nih loh hrim hrim a ngai a, pathumna luahin champion thar nihna a hlawhchhuak ta a ni.
Tun thlatir lama Malaysian Grand Prix hnehna a chan tawh bawk avangin season tawp lama rawn hlauhawm chho leh Bagnaia chuan chawlhkar hnuhnungber thlengin title race a tinung a, Inrinni sprint race-ah hnehna a lo chan tawh bawk avangin a elpui lian awmchhun Martin hmakhalh thei turin beiseina a nei a, mahse, amaha innghat ngawr ngawr a nih tawh loh avang leh pawi tham khawpa Spaniard rider a chetsual duh bik si loh avangin a title kawl lai a thlah lo thei ta lo!
Nikum pawh khan Martin hian kum 27-a upa Italian Bagnaia kuta title lut tur kha a chhaihbuai ve reng a, mahse, season-ending Valencia GP-ah talbuaiin, intlansiak tir lamah tlan chhunzawm thei lo khawpin a chesual a, a title hmasaber tur a hloh a, kuminah erawh a tum a rawn hlenchhuak ta tho a ni.
Season race vawi 20-a vawi 11 tehreng chak thei Bagnaia chuan vawithum chiah chak chunga champion-na khawp point thawkchhuak thei Martin fakin, champion phu ve reng niin a sawi a, “Vawiin hi a day a ni,”
a ti tha ve mai!
World champion vawiruk ni tawh Marc Marquez chu Pathianni Barcelona race-ah pahnihna a ni.
Season kharna intlansiak hi Valencia khawpuiah November ni 15 atana dahfel tawh ni mah se Spain ram tuilian avangin Barcelona lamah an sawn ta zawk a ni.