Bail dilna court-in remti lo
Thubuai hrang hrang siamsaka man Mizo Students’ Union president chu thubuai siamsak a nihna zingah bail phalsak a nih laiin a bail phal lohna a awm tel avangin jail-ah khung chhunzawm a ni.
Thudawn danin, MSU president Samuel Zoramthanpuia hi Anti Corruption Bureau hnuaia a case neih – u/s 403/420 PC ah chuan bail theih a nih laiin, Aizawl Police Station hnuaia case a neih – u/s 127(2)/127(7)/ 140(2)/309(5)/ 3(5) BNS ah bail theih lohna a awm a; a ukil kaltlanga bail a dilna chu Thawhtanni khan District Court Aizawl chuan a hnawlsak.
November 8-a man a nih khan court chuan bail a dilna hi hnawlsak rihin jail-a thawn nghal a ni a. Thawhtannia bail dilna ngaihtuah that lehah bail theih lohna a la awm avangin jail a la tan chhunzawm nia thu dawn a ni.
Hetihlai hian chhan dan vanga thuthar thehdarhtute kawmtu Health minister Lalrinpuii chuan, MSU president thubuai neihna pakhat, an department hnuaiah Covid len laia cheng nuai 50 pek an nih chungchanga zawhna a chhan danin, an hriat ve theih chinah, MSU hian Covid laka himna tur hian USA lamah sum dil an nei a, an ni hian a bungrua/hmanrua anga an pek dawn avangin lawnga an rawn phurhna senso atan Mizoram sawrkar hnenah sum an dil a, cheng nuai 50 hi pek an ni, tih chin bak hriat an nei lo tih a sawi a ni.
Bail dilna court-in remti lo
