Ukraine eastern frontline a Bakhmut khawpui dinhmun chu derthawng takah a awm mek a, a harsain a khirhkhan takzet tiin Ukraine President Volodymyr Zelenksy chuan a sawi.
Russian sipaite chuan he khawpui hi thlaruk kalta atang tawh khan lak tumin an bei tawh a ni.
“Hmelmate hian kan dinhmun sawhnghehna tur thil tinreng rang takin an tichhe zel a ni,” tiin Zelensky chuan a sawi a.
Hetih lai hian US Treasury Secretary Janet Yellen chuan China chu Russia hnena ralthuam pe lo turin Kyiv a tlawhnaah a vau zui nghal thung.
Kum khat kaltaa Russia-in Ukraine a run hnua inbeihna nasa ber zinga pakhat chu Bakhmut, Ukraine Donetsk region ah kalpoui mek a ni a, helai hmun hi Russia leh seperatist tena an thunun mek a ni.
Russia chuan industrial city Bakhmut hi lak ngei tumin a bei nasa hle a. Donetsk People’s Republic tia insawi seperatist leader Denis Pushlin chuan Bakhmut khawpui panna kawngpui tin chu an thunun vek tawh tiin a sawi.
President Zelensky pawhin Bakhmut thunun a nih theih nana hmalakna tin te chu Russian chetlakna nasa zawk avangin derthawng takin a awm mek a ti bawk a. Bakhmut a tluk loh nana theihtawp chhuaha bei mektute hnenah lawmthu a sawi bawk a.
President Zelensky chuan Ukraine hnenah tunlai ralthuam tha ber ber thawn lut turin ram dang ngen nawn lehin ‘tichuan Russia hmalakna lakah kan ram kan venghim thei dawn a ni’ tiin a sawi.
Thawhtanni khan sawi lawk awm lovin Janet Yellen chan Kyiv a tlawh thut a, Ukraine tanpui nan $1.25 billion pek a nih tur thu a sawi nghal bawk a.
Yellen chuan US President Joe Biden thusawi chu nemnghet nawnin Washingtion chuan indona a hnehna chan hma chuan Ukraine a pui reng dawn tiin a sawi bawk.
Yellen chuan Western ram tena nasa taka hrekna an kalpui chungin Russian economy chu a la tawm tê tawk lo a ti a, mahse, hun a kal hret anga an talbuai tur thu a sawi thung a.
Russia chuan Ukraine beih nan a military equipment te a hmang nasa tawha a tlachham tial tial tia sawiin hei vang hian China atangin ralthuam chawkluh a tum thu a sawi a, China in Russia hnena ralthuam a pe a nih chuan a nghawng na tak a awm ang a ti zui bawk a.
“Russia-in he indonaa military equipment a neih loh nana hrekna kan kalpui namnul zawnga awmze nei taka bawhchhiatna a awm a nih chuan chu chu kan en liam mai mai dawn lo,” a ti a.
Chinese sorkar lakah pawh chu chu chiang takin kan sawi tawh a, Chinese firm leh financial institution te pawhin hrekna bawhchhe zawnga chetlakna an neihin a nghawng nat theih dan an hria a ni,” tiin a sawi bawk.
Kar kalta khan US Secretary of State Antony Blinken chuan China chuan Russia hnenah weapons leh ammunition pek a tum a ti a, hei hi Beijing chuan phain a hnawl thung.
Tun hnaiah China top diplomat Wang Yi leh Russia President Vladimir Putin te chu Moscow-ah an inbia a, chu chu China leh Russia inhnimhnaihzia pholanna anga ngaih a ni bawk.
Bakhmut dinhmun derthawng hle ti
![](https://theaizawlpost.org/wp-content/uploads/tap_logo-min-large.jpg)