Ukraine leh Russia te chuan Bakhmut thunun tumna inbeihna kal zelah hloh an ngah dun hle tiin an inpuh tawn ve ve.
Moscow chuan thla tam tak chhung khawchhak lama Ukrainian city hi lak tumin a bei tawh a.
Ukrainian President Volodymyr Zelensky chuan Russian forces te chuan tun hnaiah hloh nasa tak an nei tia sawiin tun hnaiteah nunna chan 1,100 chuang an awm tiin a sawi a.
Russia chuan darkar 24 chhung lekin Ukrainian service member 220 an tihhlum thu an sawi ve thung a. Ram pahnih te thusawi hi a hranpaa finfiah ngaihna a awm lo thung.
Analysts te chuan Bakhmut chuan strategic value a nei vak lo an ti a, mahse, tichung chuan Russian commander te chuan an la hlei thei chuang lo tlat a, Russia-in tun indona a kalpui meka hloh a neih nasatna ber a ni zui tho si thung.
Bakhmut hi Russia-in la thei se chuan Donetsk region pum a thunun theihna kawng a hnaih phah sawt dawn thung a, Donetsk region hi Russia-in nikum September thlaa referandum phuahchawp hmanga Ukraine ram a awp zui tak kha a ni.
“6 March atang khan kar khat pawh tling lovah Bakhmut sector bikah hmelma sipai 1,100 kan tihlum hman a. Russia hlohna hi hnawhkhah leh ngaihna a awm lo,” tiin Zelensky chuan a sawi.
Hei mai bakah hian Russian sipai 1,500 chuang te chuang hliam na tak an tawrh avangin chetla zui theiin an awm lo a ti bawk a.
Russian defence ministry thung chuan Russian forces ten Ukrainian servicemen 220 chuang an tihlum an ti ve thung.
Bakhmut beihnaah hian Russia chuan Wagner mercenary group te chu chhuantawlawla a neih niin an leader Yevgeny Prigozhin pawhin Bakhmut lak chu an group dinhmun siam nana pawimawh lutuka a ngaih a ni bawk a. Mahse, Pathianni khan Bakhmut lak chu thil harsa lutuk tia sawiin metre tinah inbeihna a awm mek tiin a sawi a.
“City centre hnaih takah inbeihna nasa tak a thleng mek a ni,” tiin Telegram-a vocie record a tihchhuahah a tarlang a. Bakhmut lak a nih hnuah insiamremin region dang atangin sipai tur kan lak belh ang, tiin a sawi bawk.
Mahse kar kalta Inrinni khan US thinak-tank Study of War te chuan Moscow hmalakna chu a thanthu tiin an sawi a. “Wagner Group fighters te chu urban area-ah danchepin an awm a, hei vang hian hma an sawn thei lo,” tiin a tarlang.
Bakhmut-ah hian a hma chuan mihring 70,000 vel an cheng a, tunah erawh mi sang chuang awrh chauh an awm tawh a, Bakhmut hi tun hma chuan chi leh gypsum mine leh winery lian tak tak awmna a ni.
Russia ang bawkin Ukraine pawhin Bakhmut chu politics thilah pawimawhna nei tia sawiin President Zelensky chuan Russia dodalna khawpui tiin a sawi a. Nikum December thlaa Washington a tlawhnaah pawh Zelensky chuan Bakhmut chungchang chu sawiin ‘Kan morale kulhpui’ tiin a sawi.
Western official te chuan Bakhmut leh a chehhvel beihnaah hian Russia chuan sipai 20,000 atanga 30,000 inkar a hloh tawh tiin an sawi a ni.
Bakhmut lak tumnaah hloh nasa hle
![](https://theaizawlpost.org/wp-content/uploads/tap_logo-min-large.jpg)