Season kal laia vawi sarih chak tawh chunga championship hmahruaitu ni mek Oscar Piastri chu Pathianni Azerbaijan Grand Prix lap khatna lekah chesualin a tlan chhunzawm thei lo a, pole position atanga tlan chhuak Red Bull driver Max Verstappen chuan nuamsain hnehna a chang a, a hma chiah race nen intlansiak hnuhnung pahnihah hnehna a chang zawn.
Inlehpelh harsat thinnna Baku kawtthler tlankawng chepah hian Australian Piastri McLaren team-mate Lando Norris pawh lawmman semna dawhsan chuangkai pha lo zawngin pasarihna daihah a thleng a; point erawh a hlawhchhuah phak tho avangin a chung chiaha title race hmahruai mektu Piastri nena an inkar a pawthnai hret ta tho a, point 25 chauhin an inthlau ta.
Race tan phat atanga a tawp rat thlenga hmahruaina hloh chhin eih lo Dutch driver ropui Verstappen chuan kumina a vawilina atan hnehna a sualchhuak a, championship table-ah McLaren driver pahnih um kal zelin pathumnaah a thu chhunzawm.
Pathianni intlansiakah hian Mercedes khalhtu George Russell chu pahnihnaah thlengin, Carlos Sainz Jr. chu pathumna a ni a, he hlawhtlinna avang hian kum li chhunga a vawi khatna atan Williams chuan podium an lawnkai ve ta a ni.
Baku tlankawngah hian nikum pawh khan Piastri hi a chesual tawh a, qualifying-ah bang a lo su nghek tawh a, kuminah pawh lap khat em tlan chhuak zo lo zawngin a khawsa zui leh ta a ni!
Pathianni khan McLaren tan constructors’ title lak fel theihna hun remchang inhawng tawh mah se October ni 5-a tlan leh tur Singapore GP an nghah leh rih phawt a ngai dawn a, Asia tlankawngah hian an driver pahnih an chefuh tawh a nih chuan intlansiak vawi ruk la awmah constructors’ title an lo thei tawh dawn a ni.
A zawna hnehna chang Verstappen-a tan title beiseina pan der dawr tak a la awm chhunzawm ve zel a, tun driver standing-ah pathumna dinhmun luah mekin, hmahruaitu Piastri lakah point 69-in a hniam a, race vawi sarih lai a la awm avangin champion tur sawilawk mai theih a la ni rih lo!
Baku tlankawngah Italian Kimi Antonelli chuan palinaah Mercedes car thlenpuiin, New Zealander Liam Lawson chuan a career-a a tlan that ber hun tawngbuain Racing Bulls chu pangana a nihpui.
Paruknaah Red Bull khalhtu Yuki Tsunoda thlengin, Ferrari driver pahnih Lewis Hamilton leh Charles Leclerc-te pariatna leh pakuanaah an awm a; point hnuhnungber hmutu chu Racing Bulls khalhtu French Isack Hadjar a ni.
Baku kawtthlerah pawh Verstappen chak leh
