Tualchhung inelna hrang hrang a zo va, khawmual anga club leh ramte inelna a zo hlawm ta bawk. Euro 2024 a zo va, a tukah Copa America 2024 khelh zawh a ni zui bawk. 2023-24 season chu zial fel a ni ta. 2023-24 season a zawh fel rualin football a chawimawina sang Ballon d’Or dawng tur inrinsiakna boruak a lian zual a. Tun tumah hian Goal.com in Ballon d’Or dawng tura rinkai zual a tarlan te kan tarlang ang.
16. Lionel Messi (Inter Miami & Argentina)
Inthlanpui a lo thlen hian politician senior, chawl tawh mai tura ngaihte an lung a leng thar leh a, jeans kekawr hain an intuai thar leh thin. Party tan pawh politics a hmingtha, hlawhtlinna hrang hrang lo chang tawhte hming lam rik thar leh a tul a, chu chu mamawhna lian tak an nei thin bawk. An tel lo chuan kim lohna riau a awm a ni ber mai. Chutiang deuh chu a ni..Ballon d’Or sawi ruala hming lang nghal, sawi hmaih inthlahrunawm riau a awm a, chu chu Ballon d’Or vawi riat lai dawng tawhtu Lionel Messi ngei hi a ni. Goal.com in 16-na a dah hi a chunga awm tam tak kal kanin an rawn tarlang e!
Lionel Messi hian European competition a hmachhawn tawh lova, Major League Soccer lama a inlan tan vangin a thawm a reh ruih. Inter Miami lamah thawm lian lutuk nei lo mah se Copa America-ah Argentina an champion meuh chuan Messi hian thawm lianpui a rawn chhuah leh. Messi hian season lian ta khan inelna hrang hrangah goal 28 lai a la thun a, assist vawi 17 a nei. Copa America-ah Argentina a champion pui a, Leagues Cup-ah Inter Miami a champion pui bawk.
9. Phil Foden (Manchester City & England)
Phil Foden hi Manchester City tan a vul hle a, Premier League Player of the Year leh FWA Footballer of the year leh FPA Player of the year chawimawina a dawng kawp. Inelna hrang hrangah goal 28 a thun a, assist vawi 12 a nei. City hi Premier League, Club World Cup leh UEFA Super Cup ah a champion pui. Club tan chetha viau mah se ram inelna lian leh pawimawh Euro-ah beisei a phak tlat lo thung.
8. Harry Kane (Bayern Munich & England)
Striker tha, goal thun thei tak ni chunga player vanduai Harry Kane hi season liam ta khan mimal takin a chetha hle a, inelna hrang hrangah goal 52 zet a thun a, assist vawi 14 lai a nei. Mimal takin chetha viau mah se a vanduai a kaltluang a, trophy chawi a nei leh tlat lo. Euro final hial thleng mah se Spain lakah an vanduai leh a, Kane hian kut bengin season a hmang zo. Mimal taka chet that vangin Ballon d’Or dawng tura rinkai zingah a tel a, chawimawina sang dawng lovin a vanduai zui leh hmel riau thung.
7. Kylian Mbappe (PSG & France)
Ball thiam leh goal thun thei ngang a ni a, chawimawina sang dawng tur a awmin dawng tura rin zingah Mbappe hi hmaih a har thin. France forward leh tuna Real Madrid forward thar ni ta Mbappe hian 2023-24 season-ah khan inelna hrang hrangah goal 52 a thun a, assist vawi 21 zet a nei bawka a che tha vet vet hle. A club hlui ni ta PSG chu Ligue 1, Coupe de France leh Trophee des Champion-ah a champion pui. Champions League leh Euro-ah beisei a phak ta lo erawhin Ballon d’Or dawng tura rinna lamah a pawt hniam ta hret thung.
6. Toni Kroos (Real Madrid & Germany)
‘The Roger Federer of Football’ an tih hial Toni Kroos hian player angin football a chawlhsan tawh a, a ballboot a khai hil tawh. Football chawlhsan tawh mah se 2023-24-a a hnuhma tha tak vangin Ballon d’Or dawng tura rinkai zual zingah a la tel a. Chawimawina sang dawng turin duhsak a hlawh viau nghe nghe.
Midfielder ropui Kroos hian season liam ta khan inelna hrang hrangah goal khat a thun a, assist vawi 12 lai a nei. Real Madrid chu Champions League, La Liga leh Supercopa de Espana-ah a champion pui. Ram tan inkhelh chawlhsan tawh mah se an ram; Germany in a thlen Euro 2024 khel turin a kir leh. Player anga a hun hnuhnungah champion tum viau mah se champion thar ni ta Spain an hneh lova, quarter-final atangin an tla. Euro atanga an tlak rualin football khawvelin Kroos a mangtha zui ta a ni.
5. Lautaro Martinez (Inter Milan & Argentina)
World Cup 2022-ah beisei phak lo mah se Lautaro Martinez hian player huaisen leh thawkrim a nihzia a hlawhtlinna hmangin a lantir. Season liam ta khan inelna hrang hrangah goal 35 a thun a, assist vawi riat a nei. Inter Milan chu Italian Serie A leh Supercoppa Italiana-ah a champion pui a, Serie A top-scorer a ni. Club tan trophy lian pahnih a lak hnuin Argentina chu Copa America-ah a champion pui zui leh. Copa America final-ah Colombia an hnehna goal kha ama thun ngei hi niin Copa America-ah hian top-scorer a ni nghe nghe. Club leh ram tan Martinez kum tha a ni tak zet zet a, Ballon d’Or dawng turin rin a kai phah viau bawk.
4. Dani Carvajal (Real Madrid & Spain)
Defender tawnhriat ngah Dani Carvajal hi hlawhtlinna a chan atanga teh chuan Ballon d’Or dawn phu ber a tih theih hial ang. Carvajal hian Champions League, La Liga leh La Liga & Supercopa de Espana-ah Real Madrid a champion pui a. Spain chu Euro 2024-ah a champion pui leh bawk. La Liga, Champions leh Euro trophy chawi thei a nih vangin Ballon d’Or dawng tura rinkai zingah a hming a langsar thar.
Carvajal hian 2023-24 season khan defender ni chungin goal 7 lai a thun a, assist vawi riat ngawt a nei bawk.
3. Jude Bellingham (Real Madrid & England)
England leh Real Madrid player pawimawh Jude Bellingham hian 2023 nipui bazar lai khan Borussia Dortmund chhuahsanin Real Madrid a zawm a, a tifuh hle. A club thar Real Madrid tan a chetha nghal em em a, La Liga player of the year a ni nghal hial nghe nghe. Bellingham hian 2023-24 season khan inelna hrang hrangah goal 27 a thun a, assist vawi 17 zet a nei bawk. Champions League, La Liga leh Supercopa de Espana-ah an champion theih nana player pawimawh a ni.
Real Madrid tan a chetthat rualin England tan pawh a che chhe lem lo. Euro 2024-ah beisei angin khel tha vut lo mah se England hian final an thleng tho thung. Euro 2024-ah champion ngat se Bellingham tan Ballon d’Or hi hmin chiang tura ngaih a ni a, atan bel chhung sa ang hial tura ngaih a ni. Euro-ah an champion zawh tak loh vangin Bellingham tan Ballon d’Or a hla ta hreta ngaih a ni. Chuti chung chuan Bellingham hian Ballon d’Or a dawng nawlh a nih pawhin thil mak a ni hauh lo thung ang.
2. Vinicius Jr (Brazil & Real Madrid)
Player hmuhnawm, ball thiam em em mai Vinicius Jr hian 2023-24 season khan inelna hrang hrangah goal 26 a thun a, assist vawi 12 lai a nei bawk. Real Madrid chu Champions League, La Liga leh Supercopa de Espana-ah a champion pui. Club tan a chet that em vangin Ballon d’Or dawng tura rinkai ber ber zingah a tel a. A lakna rinna tichhah leh zual turin Copa America-ah champion mamawh viau mah se beisei an phak lo va, quarter-final paltlang zo lovin an tla hlauh thung. Copa America-ah champion zo ta lo mah se, Ballon d’Or dawng tura rinkai zingah a la langsar viau tho a ni.
1 Rodri (Manchester City & Spain)
Manchester City leh Spain midfielder Rodri hi tunlaia midfielder tha bera ngaih niin mual laiah a hna a tlin thei hle. Manchester City leh Spain game khai dingtu pawimawh a ni a, game tempo vawngtu pawimawh tak a ni. Hlawhtlinna chang thei turin a thawkrim a, a nungchang a tha a, a inzir peih em em bawk. Inkhel an hmachhawn zawh hnuin an khel a en let a, zir ngai a zir zui leh char char thin niin an sawi. A taimain a inzir peih bawk a, a fing a, ball a thiam em em bawk.
Rodri hian 2023-24 season khan inelna hrangah hrangah goal 12 a thun a, assist vawi 15 a nei bawk. Manchester City chu English Premier League, Caraboa Cup, Club World Cup & UEFA Super Cup-ahte a champion pui. Coty tan a chet that ang bawkin Spain tan a chetha a, Euro 2024-ah Spain a champion pui. Euro-ah a vawi li nana an champion theih nan Rodri hian a thawhhlawk tak zet a. Best Player-ah thlan a ni hial nghe nghe.
Club leh ram tan a hlawhtlinna chan hrang hrangte, club leh ram tana player pawimawh tak a nih chian em vangte in Rodri hi Ballon d’Or dawng tura rinkai ber a ni a. Ballon d’Or dawn phu ber ni pawhin a ngaih theih.
Ballon d’Or 2024 dawng tura rinkai zualte
