Ballon d’Or 2026 nominee thlirna
Thla thar October ni 26 mai khi London khuaa Ballon d’Or ceremony an buatsaih hun leh footballer chawimawina ngaihhlut hlawh dawngtu an puan hun a ni ta a, 2026 Ballon d’Or shortlist mi 30 an thlanchhuah tawhte thlirkual teh ang.
Heti zat nominee zingah hian chawimawina dawng tura rinkai zual pathumte chu Harry Kane, Lamine Yamal leh Kylian Mbappe-te niin, France captain Mbappe phei hi chuan kumin hi he award dawng tura a vanneih kum a nih a beisei thu a lo sawichhuak hial tawh a ni.
England captain Kane pawh hi Bayern Munich leh England tana season liamta hmang tha lutuk a nih avangin a inring ve hle tura ngaih a ni a; Barcelona star Yamal pawhin club leh ram tan season a hmang tha a, kumin Fifa world cup-ah a ram a champion-pui bawk a, awm ve tiu teu tak bawk a ni.
Kum 2023 hnu lama a vawi khatna atan international chawlhsan thu puang leh tawh Lionel Messi pawh nominee zingah hmuh tur a awm ve leh ta a; Inter Miami a pan hmaa he award tum riat ngawt lo dawng tawh hi top three em kai tur chuan a buk a rit tawk tawh lo mai thei!
Kum 2024-a he chawimawina lo dawng tawh Rodri chu kumin world cup-ah player tha bera thlan niin, Ballon d’Or thlanna lamah a Barcelona team-mate thar pahnih Yamal leh Pau Cubarsi-te nen vote an inchuh dawn a ni a, eng dinhmun tak luah pha ang maw?
Tuntum list-ah hian Paris Saint-Germain chuan nominee 10 ngawt thawhin, club malkhaia thawhhlawk ber an ni a; player pasarih thehchhuak thei La Liga leh panga thawhtu Premier League pawh an khum hial a ni.
Nikuma dawngtu Ousmane Dembele pawh nominate a ni ve leh a; ani bakah hian Achraf Hakimi, Marquinhos, Nuno Mendes, Willian Pacho, Khvicha Kvaratskhelia, Joao Neves, Fabian Ruiz, Vitinha leh PSG zawm thar Ferran Torres-te hmuh tur an awm bawk.
Award semtu France Football magazine-in an kawmnaah Dembele chuan PSG-ah bawk award a cham zui leh a beisei thu sawiin, “He trophy dawng tur hi a chiang leh diam tawhin ka hria a, ka ngaihdan chuan Paris Saint-Germain player kutah bawk a lut leh ang,” a ti!
Pawisa thaptute lamin an rin ber Kane chuan 2025-26 season-ah khan belhkhawmin club leh ram tan goal 72 tehreng a thun tling a, nomineepuan hmaa TNT lamin an kawmnaah Ballon d’Or chu a chinfel phak a nih loh thu sawiin, voter-te leh thutlukna siamtu tur mipui kut a nih thu a sawi a, chutih pahin season liamta kha a season hman tawha la tha ber a nih thu tarlang chungin, “Nghak phawt mai ila, engnge lo thleng dawn thlir ngawt mai ang,” tiin a beiseina chungchanga an zawhna a chhang.
Men’s nominee dang kan hmuhte zingah Real Madrid star pahnih Vinicius Junior leh Jude Bellingham bakah Manchester City striker Erling Haaland an tel.
Kumin wold cup khel pha lo Italy bakah Netherlands leh Germany ram atangin nominee an chhuak lo hlawm tawp a; Serie A lam atanga kan hmuh chhun pawh Lautaro Martinez of Inter Milan chiah a ni.
Kumin hian shortlist mi 30 zingah goalkeeper an lang pha lo a, kum 1963-a he chawimawina dawngtu Lev Yashin bawk kha a lo berah pawh kum khat dang atan keeper-te zinga he trophy hlu bik dawng thei awmchhun a ni leh rih phawt dawn!
European champion ni lai mek Paris Saint-Germain chuan title pahnih nena kum an khar leh avangin men’s club of the year award an chan mai a beiseiawm mek a; list luahtu dangte chu Bayern Munich, Arsenal, Flamengo leh Bodo/Glimt tihte an ni.
Luis Enrique, Vincent Kompany, Mikel Arteta, Luis de la Fuente leh Unai Emery-te chu men’s coach of the year ni thei tura chhawpchhuah niin, kumin world cup-a hming rawn chher hluai Vozinha pawh kha goalkeeper of the year dawng thei tur nominee zingah a tel.
Lamine Yamal chu shortlist pahnihah langin, young talent of the year award dawng thei tura chhawpchhuah player 10 zingah a lang tel bawk a ni.
Women’s Ballon d’Or 2026 nominee zingah Alexia Putellas, Bunny Shaw leh Alessia Russo-te hmuh tur an awm ve bawk.
Ballon d’Or 2026 nominee thlirna
