Ballon d’Or dawngtu Kane
Kum 2001 daih tawha dawngtu Michael Owen hnu lama English player zinga footballer mimal chawimawina ngaihhlut hlawh Ballon d’Or dawng leh thei hmasaber chu Harry Kane a ni ta a, London khuaa lawmman sem inkhawm 2026 Ballon d’Or awards ceremony-akum 25 zet an nghah hnuin England-in award an chang chhuak ta a ni.
Kane hian kum 1997 and 2002-a Ballon d’Or lo dawng ve tawh Brazilian icon Ronaldo Nazario kut atangin award a dawng.
Kum 33-a upa ni tawh chunga Bayern Munich goal thun khawl la ni reng thei England captain Kane hmaa he chawimawina lo dawng tawh Englishman-te chu Stanley Matthews (1956), Bobby Charlton (1966), Kevin Keegan (1978 & 1979) lehOwen (2001)-te an ni.
United Kingdom atanga dawng tawh zingah Denis Law of Scotland (1964) leh Northern Ireland legend George Best (1968) an tel.
Kumin hian Real Madrid leh France forward Kylian Mbappe chuan award a dawng pha lo leh ta rih a; dawn ve tawh phu a intih laiin vote hmu tam pahnihna niin, tunhnai season kaw liamta chhung khan a zawn zatin Ballon d’Or top 10-ah a hming a lang zat zat a, kumin phei chu vote hmu tam pahnihna niin, a hnaih tawh takzet a ni!
France captain sulhnu hi thlir law law ila: kum 2017-ah pasarihna, 2018 – 4th place, 2019 – 6th place, 2021 – 9th place, 2022 – 6th place, 2023 – 3rd place, 2024 – 6th place, 2025 – 7th place leh tarlan tak angin, kuminah 2nd place.
Dawng ve thei thut dinhmuna ding Barcelona leh Spain attacker Lamine Yamal pawhin Thawhtanni zan result puanah vote hmu tam top three-ah langin, Bayern Munich-a a season thumnaa a club vawn lai tana season khata goal thun hnem ber record siamtu Kane erawh an la pha lo deuh a ni.
Chawimawina ropui dawn hnuah Kane chuan, “He award hi mi tam takin an ban phaka an dah loh a ni a, kei ngei pawhin hei chen chen ka thlen hi ka ring pha ngai bik lo.
“Kawng thui tak paltlang ve a ngai a, hniam chang leh san hun a awm a, a bikin ka career tir lam a bumboh zual a, tuna superstar-te dinhmun angte phei hi chu suangtuah phak pawh a ni lo.
“Thawhrimna leh ka hun zawng zawng hlanin, mahni inrin tlatna leh tumruhna nen a chang chuan ka rilru ang lo zawnga ke pente a ngai thin,” tiin a football zinkawnga harsatna a paltlang dan a sawi.
England manager Thomas Tuchel chu Kane lawmpuitu langsar pakhat niin, England forward hlawhtlinna chu chawimawina lian tiin a sawi.
Prince William pawh Tottenham Hotspur player hlui hlawhtlinnaah a ngai mai mai thei bik lo a, captain pui tak leh player mak danglam tiin a fak ve bawk.
Kane lawmpuina’n Thawhtanni zan khan Wembley stadium chunga thir kual lian sang pui kul pup kara eng mawi an zeh khah tlat chu tihen a ni a, London khawpui a en pup mai!
Season liamta khan club match 51 khelin inelna hrang hrangah belhkhawmin goal 61 tehreng a thun tling a, Bayern player zinga season khata goal thun hmen ber niin, Europe top five league khel player dang zinga thun tam ber lakah goal 19 zetin a chungnung a; kum 11 liamta khan Cristiano Ronaldo pawhin belhkhawmin Real Madrid tan season khata goal 61 bawk a lo puitlin ve tawh bawk.
England match nen belhkhawmin game 65-ah season liamta khan Kane hian goal 73 zet a puitlin a; history kan enin Europe top league khel player zingah Kane aia season khat chhunga goal thun tam zawk awmchhun chu Lionel Messi chiah kha niin, kum 2011-12 khan Barcelona leh Argentina tan belhkhawmin goal 82 tehreng a tilut tling!
Bayern Munich star Kane hnuaia goal khung tamte chu Muller (72 in 1972-73), Cristiano Ronaldo (66 in both 2011-12 and 2014-15),Brazil striker Ronaldo hlui (66 in 1996-97), Erling Haaland (64 in 2022-23) leh Luis Suarez (64 in 2015-16)-te an ni.
Season hluiah khan football trophy lian ber ber pahnihah a champion zo lo a, World Cup leh Champions League semi-final stage-ah tlawm ve ve mah se Three Lions captain hi kum 1981 daih tawha dawngtu Karl-Heinz Rummenigge hnu lama Bayern player zinga Ballon d’Or dawng leh thei hmasaber a ni zui ta tho a ni.
Trophy chawi kawngah Kane hi a la pachhe ve khawp mai a, season liamtaa a German double kha la ni rih deuh maiin, mimal award tih lamah pawh season liamta Ballon d’Or vote hmu tam 10-na kha a ni deuh mai!
Kumina a rawn dawk tak zawk chhan hi a goal thun zozai vang niin, goal 36 nen Bundesliga top scorer a ni chiang hle a, amah hnaihbertu lakah goal 17 ngawtin a sang a; Champions League semi-final thleng kehlin goal 14 a ngah tling bawk.
Season liamtaa a champion-na awmchhun pahnih zinga pakhat zawk German Cup-ah goal 10 thunin, chu’ng zingah chuan final-a si thum faia Stuttgart an hneh tumin hat-trick a siam a; German Super Cup-ah goal khat a thawh bawk a nih kha.
Bayern hian legendary goalscorer tling thah Gerd Muller, Rummenigge leh tunhnai lawka mi Robert Lewandowski-te nei chungin Kane-a goal thun zat hi season khat chhungin kha’ng mi huai kal hmasate khan an puitlin zo lo!
Season liamta vek khan England tan goal 12 thunin, chu’ng zingah chuan World Cup goal ruk a tel.
Kumin World Cup-a Spain champion-puitu Lamine Yamal chu inring ve hle mah se kum dang nghah ngai zawng bawkin a khawsa leh a, a ruh a la no deuhin, chance a la ngah deuh bawka men’s young talent of the year award a lungawipui leh rih phawt a ngai!
Nikum khan Champions League hnehna hmangin PSG leh France star Ousmane Dembele kutah lallukhum hlan a ni a, kumin standing-ah pasarihna a ni pha ta chauh!
Kane hian nakkumah a trophy hi a humhim zo dawn em tih zawhna a piang nghal a, chu lam chu tawitein luhchilh zui lawk ila.
Bayern striker hian tun season inelna hrang hranga game 12 a khelh tawh atangin club tan goal 10 a ngah tling leh tawh a; England tan Nations League game li leka goal ruk a khawl tlin leh tawh nen match 16-ah ram leh club tan belhkhawmin goal 16 a titlut tling tawh a, tun season Bundesliga leh Champions League lamah a club a la tlawmpui lo.
Heti zela goal a khung mar chho a niha club lamah treble champion a ngat chuan World Cup, European Championship leh Copa America khelh kum a ni lo bawk nen Kane tan Ballon d’Or trophy chawi nawnna kawng a inhawng zau khawp ang le!
Messi leh Ronaldo tih loha he chawimawina ropui dawng zawn thei hnuhnung ber chu 1988 leh 1989 kuma dawngtu Marco van Basten kha a ni daih tawh a, Kane hi awmkhai leh hmasaber a ni mek!
Chuitih laiin kum hnih chhunga vote hmu tam pahnihna ve ve hauh tawh Lamine Yamal hi dahhniam a rem bik dawn hauh lo a; tun season-ah lah La Liga leh Champions League belhkhawm game 13 lek atangin goal 10 leh assist 10 nei tling tawhin, a club vawn lah chu Champions League trophy la tura rinkai niin, Champions League title la tur hian Ballon d’Or winner la chherchhuak ve ngai lo Arsenal leh Paris St-Germain pawh rinkai an ni.
Kum tharah hian a dawng ve tawh nge nge a nih chuan kum 20 mi Yamal hi Ballon d’Or dawng thei player naupang ber a ni ang.
Tun dinhmuna he award dawng thei naupang ber chu kum 1997 daih tawha kum 21 mi lek ni chunga thlan Brazilian Ronaldo kha a ni.
Real Madrid star Kylian Mbappe lah club leh ram tan belhkhawm match 13 lek goal 14 khawl tling tawh a lo ni ve leh a, Kane tana hmelma lian a ni leh mek!
Men’s Ballon d’Or winner – Harry Kane
Women’s Ballon d’Or winner
– Alexia Putellas
Men’s striker of the year – Harry Kane
Women’s striker of the year – Charlyn Corral
Men’s club of the year – Paris St-Germain
Women’s club of the year – Barcelona
Socrates Award winner – Bukayo Saka
Men’s goalkeeper of the year – Unai Simón
Women’s goalkeeper of the year – Cata Coll
Men’s coach of the year – Luis de la Fuente
Women’s coach of the year – Pere Romeu
Women’s young talent of the year winner
– Vicky López
Men’s young talent of the year winner
– Lamine Yamal
2026 Ballon d’Or top 10
Mipa
1. Harry Kane – Bayern Munich
2. Kylian Mbappe – Real Madrid
3. Lamine Yamal – Barcelona
4. Rodri – Barcelona
5. Lionel Messi – Inter Miami
6. Khvicha Kvaratskhelia – PSG
7. Ousmane Dembele – PSG
8. Erling Haaland – Manchester City
9. Michael Olise – Bayern Munich
10. Fabian Ruiz – PSG
Hmeichhia
1. lexia Putellas – London City Lionesses
2. Ewa Pajor – Barcelona
3. Khadija Shaw – Manchester City
4. Melchie Dumornay – Melchie Dumornay
5. Patri Guijarro – Barcelona
6. Caroline Graham Hansen – Barcelona
7. Pernille Harder – Bayern Munich
8. Claudia Pina – Barcelona
9. Alessia Russo – Arsenal
10. Temwa Chawinga – Kansas City Current