White House chuan US military tena Chinese spy ta nia an hriat thil pathum vansanga leng an kahthlak te chu spy nana hman nia thlunzawm mai theih a ni lo tiin a sawi.
Heng balloon te hi ‘commercial emaw research lam thil kaihhnawiha hman niin a lang a, chuvangin hlauhawm a ni lo’ tiin White House thupuangtu John Kirby chan a sawi a.
US leh Canadian officials te chuan heng balloon pathum an kahhtlak kehthem te hi an la chhar khawm vek lo thung a. A hmain Beijng chuan US chu balloon chungchangah a lova luakchhuaka chet la tiin a puh thung.
China chuan tun thla tir lama South Carolina coast-a US fighter jet-in a kahthlak a balloon chu spy nana hman a ni lo va, weather-monitoring airsship kal peng tiin a sawi.
Kirby chuan news conference a neihnaah balloon pathum Alaska, Canada leh Michigan a kahthlak te chu a keh them te chharkhawma remfel a nih hunah chuan eng atana hman chiah nge a nih a fiah chauh dawn tiin a sawi a.
“Tun thleng chuan heng balloon kan kahthlak te hi PRC (people’s Republic of China) spying programme a ni tih finfiahna kan la nei lo” tiin White House National Security Council chuan reporter te hnenah sawiin, “Ram pawn atanga intelligence lakkhawm nana hman a ni tih pawh finfiahna a la awm lo” tiin a sawi bawk.
US intelligence te chuan balloon te chu commercial emaw research lam thil kaihhnawih mai chauh ni thei niin chuvang chuan thil hlauhawm angin a lang lo tiin sawi a ni bawk a.
Mahse, tun thlengin eng company, pawl emaw sorkar mahin chung balloon te chu an ta a ni tih an la sawi lang lo tiin a sawi bawk.
China erawh chuan balloon te chu civilian airship niin research neihnan a bik takin khawchin enfel nana hman a ni a, a kalpeng sual ta a ni an ti ve thung a.
Beijing chuan ngaihdam dilna siam chuang si lovin tum loh daiha thlawkin US airspace a luh avanga pawi an tih thu an sawi bawk a.
Mahse, China Daily chuan na zawka sawina neiin ‘balloon chungchanga dawt phuahchawp hian China a tihniam dawn lo’ tiin US a dem thu a sawi a, Global Times chuan US chu ‘Inrunluihna kalpui reng ai chuan China nena inlaichinna tha zawk a awm theih nana chet la turin’ a tur thung.
China chuan US-in a kahthlak balloon keh them te chu pe let turin a duh thu sawiin China Foreign ministry thupuangu Mao Ning chuan, “Balloon te hi US ta a ni lo va, China ta a ni” tia sawiin China chuan balloon kehthem te chu pek let a phut thu a sawi a. Beijing-a US embassy ah pawh complaint an theh luh thu a sawi bawk.
Balloon kahthlak chungchangah US leh China inbakkaih zui zel
![](https://theaizawlpost.org/wp-content/uploads/2023/02/us-1.jpg)