ZPM sawrkar flagship programme Bana Kaih scheme hmanga ‘bana kaih diltu’ te hnenah cheng vaibelchhe 32 chuang pek chhuah a ni tawh a, heng zinga vbch. 18 chuang hi chu loan ni lo, a peka pek a ni.
Mizoram State Policy Coordination Committee (MSPCC) chu Thawhtanni khan an vice chairman Dr KC Lalmalsawmzauva hoin an thukhawm a. Bana Kaih phase-I hmalakna thlirlet niin, bawhzui tur dang an enho.
Thutkhawmah hian Bana Kaih scheme hnuaia loan component atanga loan pekchhuah dan thlirho a ni a; loan dilna lut zawng zawng 11439 atangin 702 pawm tawh a ni a, diltu 201-in an dawng tawh. Scheme hnuaia bank thawhpui (partner bank) ten loan an pek chhuah danah Mizoram Rural Bank-in a pechhuak tam ber a, loan 152 pechhuak tawhin, pending 176 an nei mek. State Bank of India-in 40 pechhuak tawhin la chinfel loh 84 an nei. Mizoram Cooperative Apex Bank-in loan 17 pechhuak tawhin chinfel hmabak 25 an nei.
Heti hian loan atana sum pekchhuah zawng zawng chu Rs. 14,41, 60,600 a ni a. Phase-I hnuaia detail project report pawm ngai tlem la awm chu tun tum thutkhawmah hian thlirho a ni.
Chief Minister’s Special Package hnuaiah phase-I chhungin dilna lut zawng zawng 29571 atangin 2258 thlanchhuah a ni a, a vaia sum pekchhuah zat hi Rs. 18,33, 58,370 a ni.
Loan-a pekchhuah leh CM Special Package hnuaia sum pek tawh hi a vaiin, Rs. 32,75, 18,970 a ni.
MSPCC-in ‘The Mizoram Bana Kaih (Handholding) Scheme 2024’ booklet a tihchhuaha tarlan danin, Chief Minister’s Special Package hi chu bank loan a ni ve loa, progress partner zingah bank loan la thei dinhmuna ding ve lo leh project leh bank loan inhnerem lo tana ruahman bik niin, a thlawna pek tur a ni, tih a ni. Ruahmanna (project) a cheng nuai khat aia tam hman ngai tur a nih chuan CM’s Special Package a pek theih a ni lo tih a sawi bawk.
Tunah hian Bana Kaih Scheme Phase-II dilna hawn tan leh mek niin, tun thlengin loan dilna 132 a lut tawh a; CM Special Package hnuaiah dilna 22365 a lut tawh a ni.
Bana Kaih-ah cheng vbch.32+ pe tawh
