Bana kaih diltu 1314 awm tawh
Mizoram sawrkar flagship programme kalpui mek – Bana Kaih policy-ah an bana kaih duha diltu mi 1314 an awm tawh a. Commerce & Industries department hnuaia diltu an tam ber.
Mizoram State Policy Coordination Committee chu hma an lak tawh chin thlirletin a tum khatna atan Thawhlehni khan an vice chairman, adviser to CM (Handholding) Dr KC Lalmalsawmzauva kaihruaiin an thukhawm a. ‘Bana Kaih Scheme’ kalpuitu tur department 16 atangin nodal officer leh assistant nodal officer-te an tel.
Thutkhawma tarlan danin, bana kaih scheme portal kaltlangin dilna 1314 a lut tawh a. Commerce & Industries department hnuaiah dilna lut tam berin 540-a lut tawh. Animal Husbandry & Veterinary department hnuaiah 409-a lut tawh bawk. Dilna lut zinga 1292 chu mimal anga dilna a ni a, 22 chu pawl anga dilna a ni.
Tun thlenga nodal department-ten hma an lak tawh dan sawiho a nih bakah dilna thehluh dik lo leh trade siamrem ngaite sawi a ni a. Dilna thehluttute tan a awlsam zawkna’n bana kaih scheme portal siamthat ngaite sawi a ni bawk.
Planning & Program Implementation secretary Lalmalsawma Pachuau sawi danin, bana kaih scheme portal-a dilna lut batch hmasa ber hi nodal officer-ten an thlitfim hnu ah kumin November 21 khian Apex Body-in endik hman tura ruahman a ni. November chhung vek hian progress partner tura thlante tihfel hman tum niin, training pek an ni anga, December chhungin a viltu department-ten progress partner-te loan dilna tur an buaipui sak ang.
2025 January chhung hian progress partner-te hian hma la tan thei tawh tura beisei an ni a. Progress partner thlanchhuah hi thla tin neih chhunzawm a ni tawh dawn a ni.
Bana kaih diltu 1314 awm tawh
