Bana Kaih Phase-II tan dawn
Online chauhin dil theih dawn
Mizoram sawrkar flagship program ‘Bana Kaih Scheme Phase II’ chu September 19 atang hian kalpui tan a ni dawn a. Chief Ministers’ Special Package nen online chauha dil theih a ni tawh dawn.
Bana Kaih Scheme Phase II kalpui dan tur relin Mizoram State Policy Coordination Committee (MSPCC) chu an chairman, adviser to chief minister KC Lalmalsawmzauva kaihhruaiin Thawhtanni khan an thukhawm a. Kumin September 19 atanga kalpui tan tum a ni tih sawi niin, hemi atan hian dilna thehluhna tur online portal hman dan tur enchhin a ni.
Chief Ministers’ Special Package dilna pawh online-a kalpui tum a nih tawh avangin, dilna thehlut thiam lote tan Block Development Office, Sub-Divisional Office, Deputy Commissioner Office leh Common Service Centre hman tangkai tur a ni tih sawi a ni.
Bana Kaih Scheme Phase II ah hian implementing department 18 an awm a. Mizoram Khadi & Village Industries Board, Information & Communication Technology leh Mizoram Startup Mission telh thar an ni.
Bana Kaih Phase I & II a loan emaw CM Special Package dawng tawh leh dawng turte hmalakna vil tur Monitoring Team leh progress partner ni tura dilna thehlutte zirchiang tur Search Team mawhphurhna sawiho a ni a. I&PR department buatsaih Bana Kaih Scheme Phase II’ sawihfiahna video en ho a ni.
Bana Kaih Phase-II tan dawn Online chauhin dil theih dawn
