ZPM kaihhruai Mizoram sawrkar thar chuan, sawrkarna a chelh atanga thla 9-naah a flagship programme – ‘Mizoram Bana Kaih (Handholding) Scheme, 2024’ chu nimin khan a tlangzarh ta a. Tlangzarhtu chief minister Lalduhoma chuan thlai thar pali lei nan sum dah fel a nih thu leh society kaltlanga lei tura ruahmanna duan a nih thu sawiin, society chu politics tel lo, hruaitu tha leh mi thahnemngaite kaihhruai a ni tur a ni, tiin a sawi a.
Sawhthing chungchang bikah, rate tha zawk Rs 50/- chung lama sawhthing hralh theite chu sawrkarin a buaipui dawn lo a, Rs. 50/- tling lova an hralh erawh chuan a tlin lohna zat kha sawrkarin a hnawhkhah sak thung ang, tiin a sawi a.
Sawhthing chingtu tam tak chuan, ‘kan sawhthing tharchhuahte Kg-ah Rs 50 aia sanga kan hralh theih loh pawhin sawrkar chuan Kg-ah Rs 50/-in min leisak tho dawn’ tiin, phur takin kum dang zawng aiin sawhthing chin kawngah thahnem an ngai zual niin a lang. A chhan pawh, hralhna hmuh loh awm thei lo tura an ngaih vang a ni pakhat awm e.
Chutih lai chuan, tuna MBK Scheme hnuaiah hi chuan Sawhthing tharchhuaktute hian Kg-ah Rs 50/-a leitu an hmuh loh pawha sawrkarin Rs 50-a lo leisak zar zar tur ang lam kha a hawi ta chiah lo em ni? tih chu zawhna awm thei a ni. Sawhthing tharchhuaktute hian an theih ang angin sawhthing hralhna an zawng ang a, Kg-ah Rs 30-a an hralh chuan, Rs 50 a tlin lohna Rs 20 chu sawrkarin a tumsak dawn tihna a ni mai a. Hei hi an kawtkaiah a leisak dawn nge? Sawhthing chingtute hian collection centre-ah an thlen dawn? tih pawh zawhna awm thei a ni nghal bawk ang.
Sawhthing chingtute hian sawhthing hralhna lo hre ta mai lo se, sawrkar chuan Rs 50/Kg hian a tlansak tho dawn em? tih pawh zawhna awm thei a ni bawk.
Sawhthing hi Rs 35/45 per Kg chuan lo hralh thei tehreng pawh ni se, buyer lam tan chuan tlawm taka sawhthing lei theihna chance tha tak a inhawng dawn tihna a ni mai a, hei hian nasa takin sawhthing rate a ti chhe thei mai lovang maw? tih pawh zawhna awm thei a ni bawk awm e.
Agriculture minister tarlan danin, Sawhthing chingtu hi mi 25,154 niin an tharchhuah tur beisei zat pawh quintal 10,84,975, chu chu tonne nuaikhat chuang hret, a ni a. Hei hi a Kg chuan 10,84,97,500 (vbch 10.84) a ni.
MBK Scheme hian, thlai pali zinga pakhat Sawhthing chauh pawh hi Kg vaibelchhe 10.84 vel a kai chhuak dawn tihna a ni a, hei hi sawhthing chingtute tan engtia hlu nge ni dawn tih hi kan thlir mek chu a ni ta a ni.
Bana Kaih Scheme leh Sawhthing chhiarkawp
