Mizoram sawrkar chuan Bana Kaih Scheme a kalpui mekah bana kaih turten an hnena loan an puk theihnan Union Bank of India nen thawhdunna thuthlung an ziak.
Mizoram State Policy Coordination Committee (MSPCC) chu an vice chairman, adviser to chief minister Dr KC Lamalsawmzauva kaihhruaiin Bana Kaih Scheme chungchangah Thawhlehni khan an thukhawm a. Hetah hian chief minister hoa lo sawi tawh leh a remtihna bawhzuiin Union Bank of India (UBI) nena inremna hi ziah a ni.
MoU ziahnaah hian Mizoram sawrkar aiawhin secretary Lalmalsawma Pachuau chuan hming a ziah hnan a, UBI aiawhin Regional Office Jorhat regional head Dr Suvajit Samanta chuan a hming a ziah hnan.
MSPCC thutkhawmah hian Bana Kaih Scheme hnuaia phase-II a dilna luh dan leh nodal department ho hmalakna thlirho a ni a. Partner bank-ten loan an pek tawh dan sawiho a ni bawk.
Phase-I hnuaiah loan dilna 11439 lutah 751 pawm niin, CM Special Package 29571 lutah 2255 pek a ni. Phase-II hnuaiah loan dilna 453 lut tawhah 36 pawmpui tawh niin, CM Special Package dilna 40878 lut tawhah 463 pawm a ni tawh. Phase-I leh Phase-II hnuaiah a vaiin SBI chuan an bank-a dilna lut zinga zaa 47 (81) loan an pechhuak tawh a. MRB-in 55% (244) pe tawhin, MCAB-in 75% (44) an pechhuak tawh.
Bana Kaihpuitu atan Union Bank nen inrem
