Karnataka Assembly polls-ah Congress tena hnehna an chan hnu lawkah West Bengal Chief Minister Mamata Banerjee chuan an party chuan West Bengal leh Trinamool Congress te thil duh an tihlawhtling thei dawn a nih chuan grand old party thlawp an hnial dawn loh thu a sawi.
Trinamool chairperson thusawi hian awmze thuk tak a nei anga ngaih niin Congress tena kum 2024 Lok Sabha poll-ah regional party te ‘lungrual leh chakna’ a ngai tia an sawiah ngawih a chuh reng vang a ni.
“Congress te hi seat 200 velah chuan kan chhut danin an chak hle a, chungah chuan bei se la, kan thlawp ang. Mahse, political party dangte pawh an thlawp ve a ngai bawk a. Karnataka-ah thlawp che u ila, Bengal-ah min beisei si ula kan duh lo. Thil tha neih in duh chuan hmun thenkhat chu in chan ngam a ngai,” tiin Banerjee chuan a sawi.
Lok Sabha poll neih tura “1:1 formula” chungchang sawiin Trinamool chairperson chuan regional party te chakna hmunah chuan Congress te chu an in ‘sacrifice’ ve mai tur a ni tiin a sawi bawk a.
“Hmun thenkhat leh region thenkhataa chak zawk an awmnaah chuan inbei lovin an tangho mai tur a ni a. Entir nan, Bengal-ah chuan kan tangho tur a ni a, Delhi-ah chuan AAP ten an bei mai tur a ni a. Bihar-ah Nitish leh Tejashwi ten an bei mai tur a ni a, chutiang chuan Congress te chuan formula an tichiang mai tur a ni,” tiin a sawi bawk.
Chief Minister chuan Karnataka inthlan chu BJP sorkar duhlohna lantirna tia sawiin regional party te chaknaah BJP ten engmah tih theih an nei lo, a ti bawk a.
Kar kalta lawk khan Banerjee chuan regional party hruaitu lawk Samajwadi Party chief Akhilesh Yadav, Bihar Chief Minister Nitish Kumar, Odisha Chief Minister Naveen Patnaik leh Janata Dal (Secular) leader H. D Kumaraswamy te a hmu bawk a. Karnataka Assembly poll result chhuah hma chuan Banerjee chuan BJP te beihletnaa kawngah Congress te hmalaknaah ngawih a chuh tlat thung a. May 13-a Karnataka inthlan result puan a nih hnuah Banerjee chuan southern State mipui te chu Congress hming lam si lovin lawmpuina a thawn a ni.
Trinamool chairperson thusawi hi chhangin State Congress president Adhir Ranjan Chowdhury chuan Banerjee chuan Karnataka mipuite chu Congress thlawp turin a tur ngai map lova tunah lem Congress tawlailira chuankai a tum tiin a sawi.
“Congress tawlailirah Karnataka-a chakna chan hnuah chuankai a tum a ni. Congress chu party lian a ni a, Trinamool chu regional party a ni a. Tinamool chairperson hian rilru zim tak natna a nei a ni,” tiin Chowdhury chuan a sawi.
Congress-te hian West Bengal ah Lok Sabha member pahnih an nei a, tun hnai lawkah Congress te thlawp left party candidate chuan Trinamool nominee chu Sagardigh bypoll, Murshidabad district-ah an hneh bawk.
Lok Sabha-a Leader of Congress leh berhampur MP ni bawk chuan Sagardighi bypoll result chungchang sawiin, “Bengal-ah hian Congress te chuan Trinamool Congress te an hneh thei chiang a ni. Tun hma pawhin kan ti tawh a, kum 2024 Lok Sabha poll ah pawh kan hneh leh ang,” tiin Chowdhury chuan a sawi bawk a.
Congress tena Sagardighi a chakna an chan hnuah Murshidabad a Trinamool thlawptute chuan Congress an zawm an ti bawk a, hei bakah hian Karnataka inthlan result chuan nasa takin a tiphur an ti bawk.
Banerjee-i’n Congress te thlawp hreh dawn lo
