Bang turin Manipur CM phut
Manipur tualchhung buainaa mawhphurh ber, buaina chingfel zawng ni lo, a belhchhah zawnga che zui reng chief minister Biren Singh chu bang turin an phut tih MNF party chuan an sawi.
MNF Media general secretary VL Krosshnehzova chuan Manipur sawrkar, chief minister Biren Singh kaihhruaiin a tih tur a tih loh vang leh a tih loh tur a tih avanga an state chhunga buaina nasa tak chhuak chu chinfel ni thuai se an duh a, hemi avanga Zofa unaute tawrhna chu a tam ta mah maha an hriat thu a sawi.
“Manipur tualchhung buaina chingfel zawnga hmalakna hmuh tur a awm loh lai a, buaina tizual tur zawnga hleih nei taka thuneihna hmang chhunzawm zel theia a la awm hi tha kan ti lo a. Chuvangin, chief minister Biren Singh hi bang ngam turin kan ngen. He buaina avanga pawisawi lote tawrhna kal zel hi titawp thuai turin sawrkar laipui pawh kan phut a ni,” a ti.
Kumin November 22 thlenga chhinchhiah chinah Manipur tualchhung buaina avangin Zofa unau zingah nunna chan 219 awm tawhin, hliam tuar sang tam an awm a. Kristian biak in 360 chuang tih bawrhban leh hal a ni a, chenna in 7000 chuang meivapah chantir a ni tawh a, khaw 200 chuang hal a ni tawh tih MNF Media hruaitu hian a sawi. Heng bakah hian khua atanga umchhuah, sa himna zawnga mahni in leh lo tlansan mi 41425 chuang an awm mek tih sawiin, “Heng chhiatna leh buaina thleng zawng zawngah hian Manipur state-a hotu lu ber hian mawh a phur niin kan ngai,” a ti.
Democracy ram lian bera chhal India ram chhunga nunrawnna leh pawikhawihna, sakhaw hmun thianghlim tihbawrhbanna nen lama khuahkhirh miah loha a thleng chhunzawm zel chu khawvel hriatah pawh a zahthlak hle a. Mipui thlan sawrkarin mipui chunga tawrhna thleng a enliam mek chu democracy laka helna a ni tih a sawi bawk.
Manipur buaina avanga Zofate tawrhna leh harsatna thlamuan leh ngaihtuahpui a, an thlavang a hauhna kawnga MNF sawrkar hmalakna te VL Krosshnehzova hian a sawi a. Tuna Mizorama sawrkar chelhtute pawh Manipur Zofa unaute tuamhlawm leh thlavang hauh kawngah huaisen taka ke pen zel a, an sawi thin anga hnam thinlung pu thar turin an phut tih a sawi a ni.
Bang turin Manipur CM phut
