Kum hmasa lamah Bangladesh atangin mi sang chuang Mizoramah an raltlan a, tun hnaiah erawh raltlan thar an awm lo. Raltlan lut thar an awm loh rei tawh bakah mahni khuaa kir leh pawh mi engemaw zat an awm.
Police te’n an chhinchhiah dan chuan, kum tir, January ni 11-ah khan raltlan lut thar an awm a, chumi hnuah Bangladesh atanga lut thar an awm tawh lo.
Bangladesh-a Chittagong tlang dunga Zo hnahthlakte an ralmuan loh avangin 2022 kum tawp atang khan Mizoramah an raltlan a, 2023 kha an raltlan nasat lai chu a ni ang. 2024-ah pawh raltlan hi an la awm zeuh zeuh a, kuminah chuan an awm ta meuh lo.
Anmahni lo buaipuitute chuan mi engemaw zat chu an kir leh tawh tih an sawi a, an khua a ralmuan tak deuh avanga kir an awm nual tih an sawi. Amaherawhchu, an ralmuang han tih hian ralmuang tak tak an ni chiah lo a, kir lehte pawh hi mahni khuaa awm lova hmun hima awm rih an ni fur an ti.
Chittagong Hill Tracts-a Kuki-Chin National Front te’n Zo hnahthlakte tan rorelna sang zawk an ngiat a, Bangladesh sipaite nen an inkah avangin nunau an tlanchhia a ni. Mizorama Lawngtlai district-ah an lut a, relief camp-ah leh hmun dangah an awm.
Sorkarin a chhinchhiah dan chuan, relief camp 11-ah hian mi 2042 an awm a, mi dang 329 chu relief camp ni lo hmun dangah an awm. Relief camp hi Lawngtlai district-ah vek a awm.
Chittagong tlang dung lam hi an inkah bur bur tawh loh avangin an ralmuang deuh a, mahse sipai an awm reng avangin ralmuang tak tak chu an ni lo.
Bangladesh a\angin raltlan thar awm lo rei tawh
