Bangladesh-a Zo hnahthlakte’n harsatna an tawk a, an ralmuan loh avangin mi engemaw zat Mizoramah an raltlan mek. Mizorama awm mek hi mi 1300 chuang an ni ang.
Bangladesh-a Chittagong Hill Tracts-a Zo hnahthlakte’n rorelna sang zawk an ngiat a, Kuki-Chin National Front te’n Zofate tan inrelbawlna hran ngiatin an rammu a ni. Bangladesh sipaite nen an inkap a, 2022 kum tawp lam atang khan Zo hnahthlakte hi Mizoramah an raltlan a ni.
Home department chhinchhiah danin, April ni 7 thleng khan Bangladesh atanga raltlan hi mi 1197 vel an ni a, tun hnaiah a hlawma lut an awm leh. Tun hnaiah a hlawmin mi 127 vel an lut a, a hranin mi 47 vel an lut bawk. An vaia belhkhawmin mi 1371 vel an ni.
Nikum kum tawp lam atang khan raltlan hi a hlawma lut an awm lo char char a, tun hnaiah an awm leh.
Chittagong Hill Tracts atanga raltlante hi Lawngtlai district-a khaw pakuaah awmtir an ni a, Mautlang, Chamdur P-1, Vathuampui, Parva-III, Hruitezawl, Hmawngbu, Tuithumhnar, Bungtlang South leh Hmunnuam-ahte awmtir an ni.
An tam berna Vathuampui-ah mi 296 an awm a, Parva-III-ah mi 233 an awm. Tun hnaia lut thar mi 127-te hi Chamdur P-ah an awm rih a, mi dang 47-te hi Hmawngbu-ah an awm rih.
Kuki-Chin National Front te hi nikum lam atang khan Bangladesh sorkar nen an inbia a, hei vang hian inkah pawh hun engemaw chen chu a awm lo. Mahse an inbiakna hian rah a chhuah zui tak tak lo a, tun hnaiah an inkap leh. Thu dawn pakhatah phei chuan an inbia hian rah a chhuah loh avangin a hma aia nasain an inkap leh niin a sawi. Hei vang hian raltlan a hlawma Mizorama lut pawh an awm thar leh nia ngaih a ni a, an buai zual a nih chuan Mizorama tlanchhia hi an pung tura ngaihna te pawh a awm.
Bangladesh atanga raltlan mi 1300 chuang
