Bangladesh an buai mek a, an prime minister an nawr chhuah hnuah a tlanchhe zui mek. An buaina hian he rama Zo hnahthlakte a nghawng rih lo nia hriat a ni a, raltlan pawh Mizoramah an awm belh rih lo.
Hetia an buai hma hian Bangladesh-a Chittagong Hill Tracts atangin Zo hnahthlak engemaw zat chu Mizoramah an lo raltlan tawh.
Bangladesh an buai vang hian India ram hmun thenkhatah raltlan an lut thei tih ngaihdan a awm a, Mizoramah pawh Bangladesh hnaih district thuneitute’n hemi chungchangah hian thuchhuah an lo nei tawh. Mahse Bangladesh buai hnuah raltlan lut thar an awm rih lo tih thu dawn a ni.
An ram buaina hian he rama Zo hnahthlakte a nghawng rih lo tih thu dawn a ni a, an buaina hi khawpui lam a ni hrim hrim bawk.
Bangladesh-a Zo hnahthlakte hi tuna Bangladesh prime minister Sheikh Hasina te pawl tantu an ni lem lo tih thu dawn a ni.
Chittagong Hill Tracts-a Zo hnahthlakte hian Kuki-Chin National Front (KNF) an din a, Zo hnahthlakte tan rorelna sang zawk an ngiat a ni. KNF hnuaiah hian Kuki-Chin National Army (KNA) an awm a, rorelna sang zawk hi ralthuam hmangin an sual mek.
Rorelna sang zawk an sual avang hian Chittagong Hill Tracts-a Zo hnahthlakte awmna chu indona hmun a ni ta a, hei hi Mizorama an raltlan chhan a ni.
Zo hnahthlakte chuan Sheikh Hasina kaihhruai sorkar hian KNF/KNA leh mipuite na takin a bei a, hei vang hian mipui an tlanchhe lo thei lo tiin an sawi.
Sorkar hian rorelna sang zawk ngiattute na taka a beih bakah mipui a tirethei a, lung ina tang mek pawh an awm nual tiin an sawi a, sorkar a chet nat em avangin an buaina a sosang a, an ralmuang lo an ti. Hetia an sorkar a tluk hian an ralmuang lehlih hlauh thei tih rin dan an nei a, sorkar sipaite hi khawpui lama an indah belh te a ngaih avangin KNA te pawh a hma angin an bei ngawrh lo thei tih rin dan an nei bawk. Hasina sorkar a ding leh emaw sorkar dang a ding leh emaw pawh ni se, Zo hnahthlakte laka Bangladesh sorkar rilru put hmang a inthlak ang em tih an thlir a, hei hi a chiang thuai turah pawh an ngai.
Bangladesh buai hnuah raltlan awm belh lo
