Bangladesh buainain Zofate nghawng rih lo

Bangladesh an buai mek a, khawvel hriat khawpin an buai. He ramah hian Zo hnahthlak engemaw zat an awm a, Bangladesh buaina hian a nghawng rih lo tih thu dawn a ni.
Raltlan, Mizorama lutte an kirtir bakah BSF te hian an sawisa a, anmahni ngaihventu pakhat pawh damdawi ina hruai ngai khawpin a awm tih thu dawn a ni.
Chittagong hill tracts-a Zofate ram chu Bangladesh sorkar hnuaiah a awm mek a, he hmuna Zofate hi Bangladesh buaina hian a nghawng loh bakah a nghawng vak a rinawm lo tih thu dawn a ni.
Chittagong hill tracts-a Zo hnahthlakte hian Zo hnahthlakte tan inrelbawlna sang zawk an ngiat a, Chin-Kuki National Front te’n ralthuam lekin, Bangladesh sipaite nen an inkap a, hei vang hian Mizoramah raltlan engemaw zat an awm.
Politics chhut mite leh venhim hnathawkte’n Bangladesh an buai avang hian hmarchhakah raltlan an pung ang em tih an ngaihtuah a, Bangladesh atanga raltlan an awm mekna Mizoramah an pung ang em tih te pawh ngaihtuah an awm.
Bangladesh atanga Mizorama raltlante hi Bawm an ni a, Mizorama Bawm hruaitu thenkhat chuan raltlan an pun phah an ring lo. Bangladesh-a Zo hnahthlakte hi chu, an awmna a ralmuan loh chuan raltlan hi pung thei an ni ngei a, mahse tuna Bangladesh buaina vang ngau ngau hi chuan raltlan an pun a rinawm loh tih chu an thlir dan a ni. Bangladesh buai vang ni lovin, an awmna a ralmuan loh avangin raltlan hi chu an awm belh an ring.
Kumin kum tirah Bangladesh hi an inthlang a, tuna prime minister an paih thlak Sheikh Hasina te hi an tling. Chittagong hill tracts-a Zo hnahthlakte tan chuan Sheikh Hasina te hi tling lo se, inrelbawlna hran neih hi a hnai zawkah ngaih a ni.
Chittagong Hill Tracts-ah hian Zo hnahthlak chi peng hrang hrang an awm a, Lusei, Bawm leh Pang te chu an Kristian vek niin, chi peng dangah chuan Kristian lo an la awm.
Bangladesh-a Zofate hi Mizoramah an pem nasa a, an pung thei lo; an vaiin nuai te chu an la tling mai thei tih tur vel an ni. Kum zabi 20-naa Zofate chanchina khawpui lar Syhlet leh Rangamati vela Zofate pawh an pem vek tawh nia sawi a ni. Kum 20 chuang kal taah kha chuan infiamna lamah pawh Bangladesh aiawha khel pha Zofa an awm thin.