Banglasesh Hindu hum tura ngenna SC-in hnawl

Banglasesh Hindu hum tura ngenna SC-in hnawl
Supreme Court chuan Bangladesh-a Hindu leh sakhua leh hnam tlem zawkte himna pe tura ti tura ngenna Public Interest Litigation a dawn chu a hnawl.
Chief Justice of India Sanjiv Khanna leh Justice Sanjay Kumar awmna bench chuan PIL hi ngaihtuahin ram dang thil daih a ni a, court chuan ram mite an ram chhung thil lo sawi ve theihna a nei lo niin Thawhtanni khan thu a titlu a ni.
Petition thehluttu pawhin a ngenna hi a hnuk kir ve nghal bawk.
Petition hi Ludhiana-a sumdawng leh philanthropist Rajesh Dhanda, Bhagwan Jagannath Rath Yatra Mahotsav Committee, Ludhiana Chairman leh ISKCON Mandir Steering Board vice chairman te thehluh a ni.
Bangladesh-a tharum thawhna laka Hindu-te himna pektir tura ngenna bakah hian he ram atanga India-a Hindu tlan lutte khua leh tui nihna pe turin phalna siam turin court hi ngen a ni bawk.
Heng bakah hian court sang ber hian sorkar laipui hnenah palai tir emaw, thil dang hmangin emaw, khawvel huap dan zam zuia Hindu leh tlem zawkten tihduhdah leh hrehawmna thlen thin titawp tura ti turin ngen a ni bawk.
Ministry of External Affairs (MEA) leh Ministry of Home Affairs (MHA) chu Bangladesh-a High Commission of India hnenah Hindu tihdahdah tawkte puihna leh chhawmdawlna thawn tura ti turin court hi ngen a ni tel.
Court-a ngenna thehluhah hian Bangladesh-ah hian sorkarin a hriatpuina hnuaiah sakhaw zuitu tlem zawk – Hindu, Sikh, Jain leh a dangte chuan tihduhdah an tawrh nasat avangin ram an chhuahsan nasa nia tar lan a ni a. Politics atanga pawha nawr leh khawvel dan awm anga Bangladesh chu an rama Hindu awmte laka tharum hmang lo tura hriattir tura tih ni se tia thlen a ni.
Nikum August thlaa Bangladesh-a mipui thlan sorkar paih thlak a nih hnuah a tlem zawkte thah, ruk bo, an thil chhuhsak leh tihchhiatsak a thleng nasa hle niin tar lan a ni bawk.
Citizenship (Amendment) Act, 2019-ah khan India thenawm rama sakhaw zuitu tlem zawk tlanchhia, India-a lutte chu December 31, 2014 hma lam thleng khua leh tuia pawm turin a ti a. Bangladesh-a Hindu-te tawrhna a thlen hnuah hian he ni hi sawn hla leh tura sorkar hnena thu pe turin court hi ngen a ni bawk.
Bangladesh-ah hian nikum khan zirlai huaihawttin Sheik Hasina-i sorkar duh lohna lantir a ni a, mipuiin zawmin paih thlak a ni a, India-ah a tlanchhia a. Hemi hnuah sorkar lailawk a ding a, Bangladesh Muslim-te chuan Hasina-i an huat vang leh India-a a luh bawk avangin India-a sakhaw zuitu tam ber, Hindu-te an bitum zui ta fo nia sawi a ni.