Aizawl West I bialtu MLA TBC Lalvenchhunga’n adviser to chief minister (finance) a nihna atangin banna a thehlut a, a banna hi chief minister-in pawm lo mah se MLA hian a hna a la zawm chuang lo.
TBC-a hian chawlhkar hnih chu office a luah tawh lo a, mi hrang hrangin bang lo turin ngen mah se a hna hi a la zawm chuang lo.
November ni 17-ah adviser to chief minister a nihna atanga a banna a thehlut a, hemi ni atanga kar hmasa Zirtawpni thleng khan office a kal tawh lo.
November ni 18-ah chief minister-in TBC-a banna a pawm loh thu thuthar lakhawmtute a hrilh a, chumi hnuah chuan bang lo turin mi hrang hrangin an ngen zui bawk.
Tun hnaiah pawh ZPM-a an pawl pakhat Val Upa Council hruaitu thenkhatin TBC-a hi len chilhin bang lo turin an ngen a, chumi hnuah adviser hna hi a la zawm lo.
Thu dawn danin, Val Upa Council (VUC) hruaitu thenkhat hi an leng ngei a, mahse VUC aiawh an ni lo. VUC hian he thil hi an la rel lo a, chief minister-in VUC member thenkhat a ngen a, a ngenna ngai pawimawhin VUC member thenkhat hi an leng a ni.
November ni 20 khan ZPM PAC (Political Affairs Committee) an thu a, hemi tum hian TBC-a banna chungchang hi an ngaihtuah. Amah TBC-a pawhin thil awmzia a sawi a, chumi hnuah PAC hian lamkal tirin TBC-a hi bang lo turin an ngen.
Chief minister pawhin lengah sawmin TBC-a hi a kawm tawh bawk a, chumi hnuah VUC member thenkhat an leng tawh bawk. Amah TBC-a hi LADC inthlana campaign turin November ni 26 khan a zin chhuak a, chumi hma chuan VUC member thenkhat hian an len chilh tih thu dawn a ni.
Chawlhkar hnih hnuah pawh TBC-a hi a bang tlang dawn nge a hna a zawm leh dawn tih thu-ah thu chiang hriat a la ni lo. Ama’n office kai lo mah se a banna pawm fel a la nih loh avangin office staff-te chu chawlhtir an la ni lo.
TBC-a hian banna a thehluh hma thla khat velah khan PAC-ah hian adviser to chief minister a nihna atanga ban a tum thu hi a lo sawi tawh a, chief minister pawh a lo hrilh tawh.
Banna pawm lo mah se kar hnih office tawh lo
