Kum 2027 thleng Barcelona tana goal ven chhunzawm turin goalkeeper Wojciech Szczesny chuan a contract neih lai a pawtsei a, nikuma professional football a chawlhsan zet hnua a kirleh kha ainchhir lo zel ni tur a ni!
He Polish keeper hi tunah kum 35 mi ni tawhin, August 2024 khan football a chawlhsan zet a, mahse, Catalan lamah buaina an tawk a, an first choice Marc-Andre ter Stegen chu a season hman lai chawlhsan ngai khawpin a inhliam a, a thlakna mamawh Barca chuan chawlh a puan atanga thla hnih lek hnuah Szczesny hi an sawmlut a; Nou Camp-ah chuan a chetha ta phian a, La Liga leh Copa del Rey trophy a lakpui tak hial avangin a contract neih lai chu season a hmanpui that em avangin an pawtsei leh ta deuh deuh a ni.
Germany keeper Ter Stegen khan nikum September thla khan a khup a ti na a, 2024-25 season tawp hnaih tawh lamah training a zawm ve chauh nain a tan season a tawp chawpchilh ta tho a; tuna amah thlaktu Szczesny contract an pawhsei tak siah hi chuan Nou Camp-a Ter Stegen-a hmalam hun chu a chiang lo zual ta hle a; June thla maiah Joan Garcia chu Espanyol atanga an sengluh bawk si avang leh kum 26 mi Spanish keeper Inaki Pena pawh an lehkhabu puiah a la awm vung bawk si avangin German keeper hliampui tuar hrep tan chhuahna kawng a inhawng mai ang em tih zawhna a piang lo thei lo.
Rawlthar kum 16 mi lek a nih laia Arsenal a zawm hnu khan north London club tan hian match 181 a khelhsak tling a; Spain a thlen thlak hma hian Brentford, Roma leh Juventus thuam a lo inbel tawh bawk.
Kum 2017 khan Italian giants Juve zawmin, Turin khuaa kum sarih a khawsak chhung khan game 252 lai goal a veng tling a, Serie A title pathum leh Coppa Italia title pathum bawk a lakpui hman.
Poland tan pawh goal-veng tawnhriat ngah Szczesny hian game 84 khel tlingin, chu’ng zingah chuan European Championship vawi li leh World Cup vawi hnih a tel.
Barca-a nghet Szczesny
