Barca chesual duh lo
Inrinni zanah 5-2 ngawta mualneitu Real Betis sawp lehin Barcelona chuan Spanish La Liga table-ah chak ve dang Atletico Madrid nena an inkar hlat zawng chu point ngaah bawk an dah chhunzawm leh thei.
La Cartuja de Sevilla stadium-a mipui 66,924 ngawt pungkhawm hmaah Barca player panga – Lamine Yamal (10’), Rodri (41’), Gabriel Jesus (51’), Eric Garcia (62’) leh Dani Olmo (81’)-te’n goal khat diat diat thawhkhawmin, Betis tan Valentin Gomez (27’) leh counter-attack atangin Abde Ezzalzouli (53’)-te’n an tilut ve thung.
Home team player Facundo Bernal chu ball tel loa inbakkaihnaah thiam lo zawk a nih avangin second half tir lam minute 54-na lekah red card hmanga hnawhchhuah a ni a, kha khan Real Betis tanhmun a phet zui ta tlat a, a tlem zawk an nih hnuah goal khat chiah chhuah belh bawk mah se second half-a an erletna tur kawngh a ping zui ta tlat a ni.
2026 Ballon d’Or award sem hma ni kua chauh awm tawhah footballer mimal chawimawina ngaihhlut hlawt dawng thei tura chhawpchhuah leh rinkai zinga mi Lamine Yamal a hmuhnawm leh khawp mai a, penalty area pawn atanga a goal hmahruai chhuih luh chu Betis keeper Alvaro Valles tan dan ngaihna a awm lo!
Betis si phurh hi West Ham midfielder hlui Fornals chuan sut mai bawk mah se half-time hmain 2024 Ballon d’Or-winner Rodri chuan Fermin Lopez corner atangin Catalan team hmahruai nawnna goal a thun leh zat a, kumin nipui thawt laia Manchester City a chhuahsan hnua a club thar tana a goal hmasaber a ni nghe nghe.
Tarlan tak angin, goal dang a luhbelh nual a, an mikhualna hmunah Hansi Flick-a team chuan point thum hlawhchhuak lehin, season kal lai inelna hrang hranga match 11 an khelh tawhah an la chak fai vek a ni!
Inrinni inkhel dangah pahnihna luahtu Atletico Madrid chuan Espanyol mualah point thum hlawhchhuak vein, Barca nena an inthlauhna chu point nga bawk a ni leh a; pathumna Betis chuan point 19 hum ve tawhin, palina Real Madrid lakah point khatin an sang a, nizan result tarlan hman lohah Real hian an mikhual Sevilla an hneh chuan an dinhmun hi a kang leh deuh thei ang.
Barca chesual duh lo
