Barca goal khung tur dang thei awmchhun Sociedad
Tun seaosn bikah La Liga hmahruaitu ni mek Barcelona goal thun tur dangbet thei awmchhun chu Real Sociedad niin, Pathianni zanah Sociedad hian an khelmual hman thiam Reale Arena ngei maiah an mikhual team-te hi sikhat faiin an hneh a, hliam avanga an rawlthar star zinchhuak thei lo Lamine Yamal theih loh zanah Catalan team-in an hmahruaina sawhnghet turin point an hlawhchhuak zo lo!
Tun kha season kal lai league-a Barcelona tlawm vawihnihna niin, kha result kan hmuh hnu khan Barca chuan an hnuai chiaha pahnihna luahtu reigning champion Real Madrid laka point ruka an sanna an belhchhah zo lo a, Bernabeu club hian game khata an khelh tlem zawk avangin hmahruaitu nena an inkar hi point thum leka pawhzim theihna hun tha an nei.
Pathianni zana Real Sociedad chakna goal awmchhun kha first half minute 33-a Sheraldo Becker tihluh niin, Robert Lewandowski chuan chawlhlawk hmain mikhual team tan goal khung ve ngei bawk mah se inhnial theih takin offside-a ham a ni.
Catalan-ho kha Sociedad thuthmun San Sebastian khuaa an inkhelh hnuhnung vawiliah an chak fai vek a, tuntum pawh khan rinkai zawk an ni leh ngei a, mahse, Hansi Flick-a team an talbuai ta tlat a ni.
Khel tha tawk lo Frenkie de Jong thlaktu Dani Olmo khelmual luh hnuah mikhual game a kang hlek dawn a, an mamawh ber goal an khung zo ta chuang lo.
Lionel Messi awm loh hnua hun rei zawk an innghahna lian ni tura ngaih Spain international kum 17 mi Yamal khan Champions League match-a Red Star Belgrade an hneh tumin hliam serious lutuk lo a tuar a, damchiang law law turin Pathianni zanah hahdamtir a ni a, a tel loin Barca-in goal zawnah hun pumin ball vawikhat pawh an thawnlut zo lo!
Barcelona kha inelna hrang hranga match sarih chhung chak zawn mek niin, an hneh than Basque club lakah pawh khan nuamsaa point thum hlawhchhuak leh tura ngaih an ni a, mahse, thla khat chhunga an tlawm vawikhatna an tawngbua a; an tlawm a ni satliah mai lo a, home team khan hun pumin inkhel an thunun tluanchhuak a, goal d ang thun theihna hun remchang vawi duai lo hmuin, an hun tha neih bawhpelh nual lo phei se hmahruaitu team kha chiang lehzuala tlawm thei tur an ni.
Barca kha Europe top five league zinga goal nawr na ber ni mekin, season kal laia goal 40 an ngah tawh zinga goal 15 chu Champions League lama an thun a ni a, mahse, Pathianni zan zet chu fans 36,194 pungkhawm hmaah Hansi Flick-a team khan target fuha shot an nei lo a, an tlarhma luahtute ha a bal ta emaw tih mai tur a ni!
Tarlan tak angin, Barcelona hian khelh 13-a point 33 an khawl tlin tawh hmangin league table-ah hma an la hruai chunzawm zel a, an hnuai chiaha awm Real Madrid chuan khelh 12-ah point 27 an nei.
Pathumna Atletico Madrid-in point 26 nei tawhin, pariatna luahtu Real Sociedad-in point 18 an ngah ve tawh bawk.
Barca goal khung tur dang
