Pathianni khan Spain club lian fal pahnih FC Barcelona leh Real Madrid te chuan AT&T Stadium, USA ah friendly match an khel a, La Liga champion Barcelona in si thum fai ngawtin hnehna an chang. Barcelona leh Real Madrid te hi khawvela football club inhal ber pawl an ni a, Politics thlenga inhal em em an nih vangin an inkhel hian eng ngaihven a hlawh em em reng a. Eng level-ah pawh nise hnehna changtu zawk nih tumin thapui an thawh ngei ngei a, an game a dul ngai lo. Pathiannia an inhmachhawn pawh hi friendly match mai mah ni se an game boruak a tang leh at.
Real Madrid hian an elpui lian Barcelona lakah bul an tan tha a, goal an thun hmasa teuh viau thin. Ball chang tam zawk leh goal thun theihna hun tha nghah zawk ni mah se goal chhuah hmasa zawkah an tan a. An hun tha neih an chhawr tangkai thin vangin Barcelona hian si thum fai ngawtin hnehna an chang zui ta hial nghe nghe a ni.
Barcelona tan hian Ousmane Dem-bélé chuan minute 15-naah hma-hruaina goal a thun. PSG in lak an tum Dembele hian goal thun theihna hun tha nei zui leh mah se ho takin a thelh ta thung.
Barca hian si khat faia hun rei tak hma a an hruai hnuin a tawp an khar tha a, hun tawp dawn hnaihah goal hnih an thun. Minute 85-naah Fermín López chuan kawh mar tha zeta pet goal in an goal hnihna a thun a. Minute 90+1-ah Ferran Torres chuan si nghak a pet kan hnuin awlsam takin a pet goal a, an chakna a nem nghet. Hun tawp thlengin goal dang a luh belh thei lova, inkhel hmuhnawm leh boruak sang takah Barcelona chuan si thum fai ngawtin an hmelma lian ber Real Madrid an hneh a. Arsenal an hneh loh hnuin result tha an nei zui leh nghal zat.
Barcelona 3-0 Real Madrid
