Inrinniah hnehna changin Real Madrid chuan an chung chiaha hmahruaitu Barcelona nena an inkar an pawtzim hlek a, Pathianni zanah sihnih faia an mikhual Cadiz FC hnehin Catalan team chuan Real nena an inkar an pawtzim ve leh nghal a, Spanish La Liga table-a an hmahruaina chu point riatah bawk an dah chho leh.
Nou Camp inkhelah Barca hian club talbuai Cadiz lakah goal an thun nghal buan buan thei bik lo a, first half chhungin an tilut hman dawn lo emaw tih hnu minute 43-ah Sergi Roberto chuan mualneitu team goal hmasa zawk khungin, chawlh-lawk hma hun pekbelh minute thumna a zawh hmain Roberto hian Robert Lewandowski tauhluh tur goal a chhawpsak ve leh a; ti hian, La Liga season kal laiah Poland international Lewan-dowski hian goal 15 nei chungin top scorer dinhmun a luah kal zel a, Karim Benzema leh Joselu aiin goal liin a khung tam tawh zawk.
Nikum October ni 23-a sili faia Athletic Bilbao an sawp tum khan Sergi Roberto leh Robert Lewandowski hian Nou Camp-ah goal an lo thun dun tawh a, tun hi khami hnua home-a league goal an khung dun leh tumkhatna chiah a ni.
Pathianni inkhelah Xavi team hian goal dang thunbelhna hun remchang pawh an nei a, mahse, Lewandowski hian goal kham a petper hlauh a ni.
Poland striker hian league game 19 atangin heti zat goal hi a ngah tling ta a, tun kum zabi tharah 2009-10 season-a game 17 atanga goal 15 thun tling Cristiano Ronaldo chiah kha Lewandowski aia La Liga goal 15 thun tling tura game mamawh tlem zawk awmchhun a la ni.
Tarlan tawh angin, tittle race kal laia Barcelona hnaihbertu Real Madrid chuan Inrinni khan sihnih faia Osasuna hnehin Catalan team nena an inkar chu point ngaah an pawthnai hret a, Nou Camp club-in point thum hmuh belh chungin point riatah Real nena an inkar an pawthla leh a; La Liga game an khelh hnuhnung vawisarihah chak vekin, an league game hnuhnung 13-ah tlawm an pumpelh a, inelna hrang hrangah belhkhawmin an match khelh hnuhnung vawi 18-ah tlawm an pumpelh bawk.
League season kal laia Barca defensive record pawh hi a tha khawp mai a, La Liga game 22 an khelh tawhah tum 17 zet an lama goal lut tur dangin, kum 1993-94 daih tawha Deportivo de La Coruna-in clean sheet vawi 16 neia record an lo siam tawh kha an khum rualin Spanish title vawi 27 lak tlin an tumna a kal fuh zel.
Roger-a goal vawihnih hnawl-sak an nih avanga goal khung zo ve ta lo Cadiz hian point hnihin ‘relegation zone’ an la chhuahsan hram hram.
Tun season league game vawi 22 an khelh tawha vawinga chiah la chak Cadiz hian point 22 nen table-ah 17-na an luah mek a, an aia game khata khel tlem zawk Valencia lakah point hnihin an la sang.
Point 59 nena hmahruaitu Barca hi La Liga table-a anmahni hnaihbertu Real lakah point riatin an sang tawh tih tarlan a ni tawh a, pathumna Real Sociedad nen phei chuan point 16 ngawta inthlau tawhin, point riat leh a aia sanga hma an hruai tawh reng rengin Barcelona hi title race-ah an la tlusawp ngai lo a, kumin pawh hi an champion kum ni leh tura ngaihna a lian hle.
Ningani zan hian first leg-a 2-2-a an inhnehtawkpui tawh Manchester United nen Old Trafford-ah Europa League playoff an khel leh dawn a, tualchhung football lama an chetfuh tluan laia England lut tur an nih avangin Barca hian inrintawkna pawh an neilian deuh tura ngaih a ni.
Barcelona an kal fal leh nghal
![](https://theaizawlpost.org/wp-content/uploads/tap_logo-min-large.jpg)