Barcelona kawtkaiah champ lai PSG an hawi champ!
Nilaini zan Champions League inkhel pakhatah defending champion Paris St-Germain chuan Spain ramah 2-1-in mualneitu Barcelona an hneh a, tun season-ah pawh Europe champion nih tum ngam tan Ligue 1 giants hi paltlang ngai tak an ni leh ngei dawn e!
He inkhelah hian first half minute 19-naah Barca lamin goal an thun hmasa a, veilam sir atanga Marcus Rashford siamsak atanga Ferran Torres thun niin, England star Rashford hian Barcelona tana a game khelh hnuhnung vawi rukah vawi nga chu goal a thun loh pawhin assist a nei fai vek a ni!
Trophy holders PSG hi season liamtaa treble champion ni thei kha an ni a, kumina nep thut thei an ni lo a, Nou Camp thuamthat chhunga home ground atana an hman mek Olimpic Lluis Companys-a mipui 50,207 pungkhawmte ngawihtir duk turin minute 40 khelh tlin dawnah an siphurh an sut a; he goal hi Portuguese left-back Nuno Mendes thawhrah atanga French rawlthar kum 19 mi Senny Nsona Mayulu tihluh a ni.
Mayulu hian Munich khawpuia season liamta final-ah khan goal a lo thun tawh a, Nilaini zana a goal sualchhuah leh nen Champions League goal hnih a khawl tling ve ta chiah a ni.
Mikhual team khan hliam avangin player chhawr theih loh an nei nual a, chuti chungin hnehna chang thei tura chance ngah zawk an ni a; minute 90-ah Moroccan right-back Achraf Hakimi cross atangin Goncalo Ramos chuan Paris St-Germain chakna goal a khung a, Champions League title la thei tura rinkai pahnih inbeihnaah French champion an chungnung zawk.
PSG kha away team zinga Europe inbeihna last minute goal hmanga Barcelona hneh thei hmasaber an ni.
Chakna goal pawimawh thuntu substitute Ramos chuan chak an phu nia a ngaih thu leh khel tha zawk an nih thu a sawi a, an game ruahman dan ang takin an khel chhuak thei niin a sawi bawk.
Portuguese striker Ramos hian sili faia Atalanta an sawp tum pawhin final minute-ah goal a lo thun tawh bawk a ni.
Kha result nen khelh hniha point ruk hmu chungin Barca chuan table-ah pathumna an luah a, an chungah point ruk bawk hum ve mek hmahruaitu Bayern Munich leh Real Madrid an awm.
Season liamta Champions League final-a 5-0 tehrenga Inter Milan sawp chunga phu taka Europe club champion rawn ni ve ta nge nge PSG khan Spanish champion Barca kawtkaiah ngei point thum an rut thei a; kha mah mah an first-choice front three – Khvicha Kvaratskhelia, Ousmane Dembele leh Desire Doue-te bakah captain Marquinhos-te hliam avangin an chhawr thei lo a; warm-up laiin midfielder Joao Neves a la inhliam tak bawk!
Barcelona lamin bul an tan fuh zawk a, a sir tawn tawnah Rashford leh Lamine Yamal an nghal hle a, goal hmahruai pawh an hlawhchhuak ta mai reng a, mahse, Barca boss hlui Luis Enrique chuan a club hlui a tlawh tumin tlawm a tum lo a; a thluak hmangin PSG lamin an class dik tak pholang lehin, an full-back pahnih siamsak atangin an lama goal khat lut chu goal hnihin an chhanglet thei.
Hun tawp dawnah PSG hian goal thun theihna hun remchang an nei chho mawlh mawlh a; Lee Kang-in chuan goal ban a petper a; a hnuah substitute dang Ramos chuan chakna goal a thun zui ta nge nge a ni.
Barcelona hian khelh hniha point thum hum chungin table-ah 16-na an luah.
Barcelona kawtkaiah champ lai PSG an hawi champ!
