Basketball inkhawmpui lian lamah aw…

Basketball inkhawmpui lian lamah aw…
Mizoram Super League (MSL) Season 9 khelh mekna hmun R. Dengthuama Hall lam hawiin Thawhlehni tlai-ah khan ring ka fan iak iak a… Kan naupan lai, football uar veng atanga mi tlem te basketball ngaina awmchhun zinga mi ka nihna rau chiah mai kha a rawn thawk leh tlat!
Mizo zinga basket-ball thiam ka tih ber leh thleng thui ber, Lalrina che vel tur te, Mizo damlai zinga sang ber Matthew leh Big Mike innek salh salh tur te, rangkachak tawlhna leh ruihhlo bawhbuai khaw-pui tia Vairengte thlang lam hovin min nuihsawh lai taka North East India state-te’n basketball hmanga an inelnaa Mizoram champion-pui nawn awn awntu, Mizo ti hmingthatu Mizoram player rual zinga TBL leh BCA player inlan tur te, MSL history-a coach hlawhtling ber ka thianpa Afela’n club enkawl lova MSL match Commi-ssioner mawhphurhna a la daih hmel serious thupui fun lutuk tur vel te, American pa lian hrawl zet club pahnihin an kawlte innawr tur ka’n mitthla chhunzawm a – chhungrila min nawr-tuin phurna min ‘khilai’ do zo lovin inkhel ka en leh ta nge nge…
Jim Carrey-a’n (The Mask), “Somebody stop me…” a tih ?um a, chelh dingtu a nei lo ang mai kha ka ni, ka chakna daltu an awm lo!
Mizo size avanga basketball khel chi kan ni lo tihte chu chhanlet tlak a nih lohna a rei tawh. Fit 7’4 pawhin a dan zawh loh fit 6’2 Stephen Curry-a’n NBA-ah ro a rel – size aimahin skill lam biahthu a ni.
Mizo fit 6 chin chung thuau, thiamna leh thahrui hmanga an inkhel chu hmuhnawm tak a ni – mitmu fiah tak hmuh theihna neih hi nihlawhthlak deuh a ni!
Philipino hnam ang maia basketball ngaina Mizo thalai inkhel en pungkhawm tamzia leh ka’n nui thum leh hak thin te kha a nuam veng veng – puithu uap churh reng zawng a khamawm!
Mizo club tha fal ber pahnihte inkhelah erawh Puma pheikhawk bun larsaktu, Thailand-ah pawh lo han fehchhuak a, Mizoram chief minister pawha India ram thalaite’n an hriat hlawh zawk, Mizo hnam vawi duai lo India rama chawilartu Lalrina Renthlei a khel tha lawr lak, lawmman pawh an pek kha.
“Hnam dangin an dunk reng bik, dunk ve teh!” tiin court side atangin Rina hi ka lo cho deuh salh a; a nui a, BCA talbuai karah dunk aia tangkai, hun khirhkhana a chung-nunzia lantirin, ‘3 points a score a’, Mizo basketball player piang tawh zinga a that berna a nemngheh nawn leh sak kha!