Bawhrsap-in loneitute a tlawh
Lawngtlai district bawrhsap Cheemala Siva Gopal Reddy leh Horticulture department hotute chuan Zirtawpni khan R Vanhne leh Sihtlangpui rama huan an tlawh.
Kuthnathawktute chu ei leh bara ram leh hnam intodelh tura thawktu an nih angin, theihtawp chhuaha thawk zel turin bawrhsap hian a fuih a. An thlai chinte hlawk zawka an thar theihna turin Horticulture department nen thawhhona tha a awm a pawimawh, tiin, thawhhona tha nei zel turin a chah. District administrator a nihna anga puih theihna kawngah puih a inhuam reng tih a hrilh bawk.
‘Field visit’ ah hian R Vanhne rama Runmanga leh B Bawithanga sawhthing hmun leh Sihtlangpui rama Lalbiakdika huan an tlawh a. Runmanga hian sawhthing quintal 10 chingin, quintal 75 thar a inbeisei tih a sawi a, nikum khan quintal 45 a thar tawh a ni. B Bawithanga hian sawhthing quintal 15 a ching a; Lalbiakdika hian balhla, theihai, tomato, Dragon fruit leh thlai dang a ching. Tunah hian theihai leh balhla atang hian value addition hmangin thil siamchhuah a nei mek a ni.
Bawhrsap-in loneitute a tlawh
