Bawkvak chak record siam
Kut leh ke hmanga leia kal chu bawkvak kan ti maia, Japanese, Ryusei Yonee, kum 22, chuan bawkvak a meter 100 thleng rang ber record a siam a, second 14.55 chhungin a bawkvak thleng hman. Bawkvak han ti ila, a khup hmangin, a kephah leh a kutphah hmangin a kal. Hetiang hian meter 100 thlen nan second engzat nge i hman, han inchhin ve teh, Guinness World Record te pawh i lo siam thei reng maithei asin!
Meter 100 bawkvak thleng rang thei record hmasa ber chu 2008-a Kenichi siam niin, second 18.58 chhungin a thleng man a, he record hi khumtu awm lovin a ding ngar ngar a, 2022 kan American Collin McClure-a’n rawn khumin, second 15.66-ah meter 100 a bawkvak hman a, he record hi Ryusei hian a rawn khum ve leh ta a ni.
Meter 100 thlan thleng rang thei ber record siamtu chu Jamaican tlanchak Usain Bolt niin, 2009 khan second 9.58 chhungin a thleng hman a, hmeichhe lamah chuan American tlanchak Florence Griffith-i record siam second 10.49 a la ding ve thung. Anni pahnih hi ke-a tlan an ni a, ke a tlan record nena khaikhin pawhin bawkvak chak Ryusei record hi namai lo tak chu a ni.
Ryusei hian a naupan lai atang tawhin ramsa te ke pali hmanga chak tak taka an tlan chu hmuhnawm a tithin a, a zir fo thin. High School a kal laiin tum khat chu an zirtirtuin a fuih phur ta a, chuta tang chuan bawkvak chak record siam chakna a nei tir ta niin a sawi a, “Kan zirtirtuin ramsa te ke pali hmangin an tlan chak zawk tih a sawi a, chuta tang chuan keipawhin mihring zinga bawkvak chak ber ka nih theih ka inring ta a ni,” a ti.
Ryusei hian ramsa te chetla vel a thlithlai thin a, an ke pali hmanga an tlanchak dan hriatchhuah a tum thin a, sports trainer leh sports doctor te thurawn a la bawk thin niin a sawi a, tunah record a siam ta a, chawlhsan mai a tum chuang lo, “A hma aia nasa lehzualin ka inzir ang a, record dang ka la siam belh zel ang,” a ti.
Bawkvak chak record siam
