Bawlhhlawh chi 4 thliarhran leh in
tin atanga lakkhawm bul tan dawn
Aizawl Muncipal Corporation huamchunga ward thlan bik pasarihah bawlhhlawh chi 4-a thliar hran leh in tin atanga bawlhhlawh lakkhawm bul tan a ni dawn a, Ningani khan khuhhawn a ni.
Khuhhawn a nih atang hian Aizawl khawpui chhunga AMC Ward No. 3, 6, 8, 11, 13,16 leh 18 ah a thawh khatna atan bawlhhlawh chi li-a thliarhran phawt a ni dawn a. Bawlhhlawh chi li – tawih thei (wet waste), tawih thei lo (dry waste), sanitary waste leh special care waste-ah thliar hran tawh tur a ni. Local Council ruahmannain in tin atanga bawlhhlawh thlair sa lakkhawm tan a ni tawh dawn a, hengte hi bawlhhlawh sawngbawlna hmun SWMC Tuirialah pawh AMC chuan uluk takin a endik thin dawn a ni.
Khuhhawngtu UD&PA minister K Sapdanga chuan, faina hi ram leh chhungkaw changkang leh changkang lo tehna a ni zel a, hun rei tawh tak atang khan Mizo nu ho chu an bungbel fai kawngah an inel tawh thin tih a sawi. Tunhnaia India ram state capital fai tehnaah Aizawl chu 9-na a ni, tiin, pakhatna ni tura theihtawp chhuah a tul tih a sawi a ni.
“He bung thar kai turah hian harsatna kan tawk ang tih chu hriat sa a ni a; nimahse, Mizo tlawmngaihna hi faina nena kan suihzawm tlat chuan kan fai anga, kan faina a nghet bawk dawn,” a ti a. In tina bawlhhlawh khawntute pawh tlawmngaihna nen thawk turin a duh tih a sawi. Kohhran leh pawl hrang hrang leh social activist-te nena thawhhona tha tak neih a tul tih a sawi bawk.
Chief secretary Khilli Ram Meena pawhin, Solid Waste Mangement Rules 2026 chu khauh taka kenkawh a, zawm a tul tih a sawi a. He dan zawm lo leh dan anga hma la lo chungah hremna pek a ni dawn a, state sawrkar pawhin chak takin hma a la tih a sawi. 2027 March 31 hmain bawlhhlawh chi 4-a thliarhran leh in tin atanga bawlhhlawh lakkhawm hi tih vek tur a ni tih a sawi a ni.
Bawlhhlawh chi 4 thliarhran leh in tin atanga lakkhawm bul tan dawn
