Bawlhhlawh halna khawl kum 2022-a lei tawh hman lohin dah – K Sapdanga

Bawlhhlawh halna khawl kum
2022-a lei tawh hman lohin dah
– K Sapdanga
MNF kaihhruai Aizawl Municipal Corporation chuan Tuirial-a bawlhhlawhna sawngbawlna hmuna hman tur bawlhhlawh halna khawl cheng nuai 200 chuanga lei chu tun thlengin hman lohin an la dah a, hman tangkai an tum lo nia a lan thu ZPM hruaitu K Sapdanga chuan a sawi.
Aizawl North-III huamchhung veng hrang hranga ZPM Thalai Hqrs. in Thawhlehnia street campaign an neih a hmanpuinaah bialtu MLA, UD&PA minister K Sapdanga chuan MNF kaihhruai AMC chuan bawlhhlawh min thliartir a, Tuirial kamah an paih khawm leh tho si tih sawiin, “Bawlhhlawh halna, incinerator khawl kum 2022-ah Rs. 2,60,78,000 in an lei, hman lohin an la dah. Lei kha an duhtawk viau a, hman tangkai lam an tui thleng lo a nih hmel,” a ti.
AMC-ah Congress term khat, MNF term hnih chhungin Aizawl khawpuiah ram rotling sulhnu hmuh tur a vang tih a sawi a. ULB Fund, State Fund, Property Tax chu dik taka hman ni se, Aizawl khawpui hmel tihdanglamna tham nia a hriat thu a sawi.
AMC-ah ZPM a sawrkar chuan AMC huamchhunga in sak phalna awlsam zawka mipuiin an neih theihnan dan siamthat ngai ennawnin siamthat an tum anga, AMC huamchhunga vawk vulh khapna dan ennawn a ni dawn tih a sawi a ni.
Bawlhhlawh hman tangkai an tum dawn niin UD&PA minister hian a sawi a. Door to door collection enchhin thuai, chhuah lamah tawih thei chauh – leitha siamna atan, tlak lamah tawih thei lo chauh – material recovery facility for factory atan, chhim lamah in sakna/ thiahna – C&D bawlhhlawh chi thum chu khawla process a, man tlawm te tea hralhin sum hnarah chantir an tum tih a sawi.
Storm drain- kawrpui leh tuidawn thlunzawm an tum tih a sawi bawk a. Kawr lian chinah UD&PA-in mawh a phur anga, kawr laihawl chu MLA-ten bitumin, kawr tesep/side drain chu composite fund hmangin thawh nise, tiin an ruahman dan a sawi a ni.
Mipui sukthlek enin, intelectual titi atang chuan ZPM-in hneh takin sawrkarna an siam an beisei tih K Sapdanga hian sawiin, “Kum 2023-a LMC inthlan khan negative thli – Covid laia RTPCR khawl fit duh loh thli leh kawng chhe thli a tleh na viau a. Tuna Aizawla thli tleh mek chu positive thli – corruption fihlim thli, kawngpui tha thli, health care thli a ni. LMC thli aiin AMC thli hi a na zawk a. Result erawh Pathian leh mipui kutah a awm,” a ti.