Bawlhhlawh paihna hmun kang, hman leh theih tawh

Bawlhhlawh paihna hmun kang, hman leh theih tawh
Aizawl mipuite bawlhhlawh paih khawmna Solid Waste Management Centre (SWMC) a kang a, Ningani khan bawlhhlawh phurtu lirtheite pawh an tlan lo. Mahse bawlhhlawh paihna hmun hi hman theih leh nghal a ni a, Zirtawpni-ah chuan bawlhhlawh hi a paih leh theih tawh ang.
Ningani tlaiah khan AMC-in order an chhuah a, March ni 28-ah SWMC hi hawn a nih tur thu, mahse fimkhur thu-ah pawn lam mite luh phal a nih loh thu te an sawi.
Tuirial Airfield Venga SWMC hi Nilaini zan khan a kang a, bawlhhlawh paih khawm theih a nih dawn loh avangin a tukah bawlhhlawh phur motor an chawl. Mahse Ningani tlai lamah khan a mit tawh.
Fire & Emergency Service te leh AMC lamin theihtawp chhuahin an thelh nghal a, akhu tihreh tumin an bei bawk.
AMC lam atanga thu dawn danin, tute emaw hal emaw tihkan emaw lam ni lovin bawlhhlawh inchhek khawm inup lum atanga kang a nih hmel a, bawlhhlawh indelh muk atang hian methane a insiam a, chutianga kang ta chu a nih hmel an ti.
AMC hotute chuan SWMC-ah hian lirthei 150 velin bawlhhlawh hi ni tin an paih thin tih an sawi a, Aizawl khawpuia Local Council 85 huam chhunga mite bawlhhlawh paih thin a nih thu leh, ni khatah bawlhhlawh hi ton 100 vel paih thin a nih thute an sawi.
SWMC hi AMC kutah 2021 March ni 1-ah dah a ni a, bawlhhlawh hi tawih thei leh tawih thei lo te thliar niin, a theih ang anga dehral thin a ni.
Ningani khan SWMC hi deputy mayor R Thanglura, executive corporator Laltlanzova Khiangte leh Zonunsanga, corporator David Zohmangaiha, Vanlalneia leh Rosiamngheta te’n an tlawh.