Hyderabad leh Odisha police te tangkawp chuan Bawng vulhna hmun pakhat an dapna atangin pawisa tam tak an man tih inrinni khan an sawi.
He thil an hmuhchhuahna hmun hi Kamarda police station huam chhung Badamandaruni khuaah an nih thu an sawi a, he thila mawhphurtua puh Gopal Behera erawh a tlanbo mek tih an sawi bawk.
Police te sawi danin he thiltitu nia rinhlelh Gopal hi Hyderabad-a agro-based company a thawk niin, company locker atangin cheng nuai 20 chuang a ru nia sawi a ni a, he thil a tih hnu hian a unaupa Rabidra Behera kaltlangin an khaw lamah heng pawisate hi a thawn nia sawi a ni.
Hyderabad police te chuan complaint an dawn bawhzuiin Kamarda police te nen Rabindra in chu an dap a, an bawng vulhna hmunah heng sum chheprelhte hi an hmuhchhuah thu an sawi.
He thilah hian inhnamhnawih dang an awm em tih police te chuan an chhuizui mek thu an sawi a, Gopal leh a unaupa hi an tlanbo mek avangin ngawrh taka an zawn thu an sawi bakah, an chhungte zinga pakhat chu thuzawhfiah tura an kawl rih thu an sawi bawk.
Bawng vulhna atangin pawisa dah that tam tak man
